11. i 12. julī Rēzeknē nūtiks VII Storptautiskais etno festivals “GOSTI”, kas īprīkš pazeistams kai Nacionalūs kulturu festivals Rēzeknē, nu festivala ideja i tradicejis palīk namaineigys – tys atkluoj prīcu par gostu gaideišonu, meilu uzjimšonu i leiksmu kūpā byušonu. Itūgod festivals puļcēs ap 800 dalinīku nu Latvejis, Lītovys, Igaunejis, Boltkrīvejis, Krīvejis, Pūlejis, Ukrainys i Turcejis. Vaira kai 50 kolektivu itūgod vīnuos kūpeigā festivala tema – sīna laiks i sīna tolka, gosti i ļustiešona aba “Gosti, iz sīnatolku”!

Dažaida muzyka,tautysdzīsmis i dejis Rēzeknē izplauks kai skaistys pučis pļovā, kur atškireiguos kulturys izpausmis cyta cytu papyldynoj, pylnveidoj i, leidza pastuovūt, vuica respektēt cytam cyta dvieseliskū boguoteibu.

11. julī 19.00 festivals īsasuoks vīnlaiceigi i piļsātā ar koncertu “Pļuovu sīnu pa vysu dīnu”, i vairuokūs Rēzeknis nūvoda pogostūs – Lendžūs, Veremūs, Strūžanūs i Feimaņūs, kur uzastuos tautys muokslys kolektivi nu Latvejis, Lītovys, Boltkrīvejis, Krīvejis, Pūlejis i Ukrainys.

12. julī nu 10.00 Rēzeknis piļskolnā vysi aicynuoti baudeit latgalīšu sātys vīsmīleibu – byus i latgalīšu, lītaunīku i boltkrīvu sīna tolcuonu sasadzīduošona, i sovstarpiejuos saceņseibys sīna stogu likšonā i cytūs tolkys dorbūs. Piec kuorteiga dorba paradzāta ari sīna tolkai atbylstūša maļteite.

Kod sīna tolkys dorbi byus apdareiti, nu 14.00 sevkurs varēs izbaudeit ari cytu vaļstu nacionaluos kuknis lobumus – pi “Zeimuļa”, koncertzala GORS i Festivala promenadē gar Rēzeknis upi dorbuosīs ukraiņu, lītaunīku, pūļu, boltkrīvu i krīvu sātys, kur tautys muokslys kolektivi prīcynuos ar dzīsmem i dejom, bet sātys saiminīki cīnuos i tierguosīs ar nacionalim gordumim i omotnīku darynuojumim.

Festivala dižkoncertā “Rēzeknes vārtos – dziesmu zārdi” kūpā dzīsmis skandēs i deju rokstus veiduos deju kūpys, dzīšmu i folklorys ansambli nu Latvejis, Krīvejis, Boltkrīvejis, Ukrainys, Pūlejis, Lītovys i Turcejis, ļaunūt sajust sovstarpejū sābru kulturys tradiceju styprumu i boguoteibu.

Piec struoduošonys i koncertu baudeišonys, ļustiešonuos pīktdīnis i sastdīnis vokorā nūsaslēgs ar nakts koncertbalu, kur sevkurs varēs kuojis izlūceit jautrūs dančūs i raudzeit sarunuot sev tolcuonus cytai vosorai.

Storptautiskais etno festivals “Gosti” (īprīkš Nacionalūs kulturu festivals) Rēzeknē nūteik kotru ūtrū godu i tys ir ījiems stabilu vītu kūpejā kulturys nūtikšonu kalenderā. Tuo pyrmsuokumi vaicojami aktivā i sistematiskā Rēzeknis nacionalūs bīdreibu darbeibā, kas izapauž tīksmē apzynuot i saglobuot sovu etniskū identitati. Festivala mierkis – caur tautys muzyku, dejom i ritualim atkluot i paruodeit plašuok Rēzeknē, Latgolā i cytuos Latvejis vītuos dzeivojūšūs  mozuokumtauteibu etniskuos kulturys vierteibys, tūs īsakļaušonu i atteisteibu šudiņdīnā.

Festivalu organizej: Pošvaļdeibys agentūra “Rēzeknes Kultūras un Tūrisma centrs”, sadarbeibā ar Rēzeknis piļsātys dūmi, Rēzeknis Nacionalūs bīdreibu kulturys nomu, Rēzeknis nūvoda dūmi i Eiroregiona „Ezeru zeme” pošvaļdeibu asociaceju.