Pyrms vairuoku godu “Latgolys Radejā” izskanieja 47 cykla “Volūdys vaicuojums” raidejumi, kurus sagataveja žurnaliste Maruta Latkovska. Nu paguojušuo goda suoku raidejumu materialus var puorskaiteit žurnalā “Katōļu Dzeive”, nu niu vareiba ar tim īsapazeit dūta ari LaKuGys skaiteituojim. Itūreiz publicejam raidejumu materialus nu “Katōļu Dzeivis” 2013. goda juņa numera.

Deveitais raidejums (partikulys)

Loba dīna!

Šudiņ “Volūdys vaicuojumā” kūpā ar Jums Maruta Latkovska.

Ir daguojs laiks parunuot par partikulom.

Mes, latgalīši, asam vysā emocionali ļauds. Tys ir rakstureigs i pīdareigs myusu mentalitatei kai cymds rūkai. Tod pats par sevi ari palīk skaidrys, ka myusu volūdai ir juobyut boguotai ar partikulom i izsauksmis vuordim.

Latgalīšu volūdā runys niansiešonai plaši izmontoj gon vīnkuoršuos partikulys, gon partikulu kūpys.

Vīnkuoršuos partikulys veidoj vīns vuords, pīm., vys, koč, kab, vēļ, i, pat, to, tok, nui, kazy(n), nazy(n). Par pīmāru: Vys jau jis atsagrīzs; koč kod to tu atīsi; kab tik ar munim meilajim tys nanūtyktu; vēļ jau nav vokors atguojs; i nadūmoj, i naguodoj, te tu tuo naatrassi; pat duorzā juo nav; to tu maņ tai i napastuosteisi; tok najiemu es itūs gruomotu; nui, es apsūleju i tū izdareišu; kazyn kod tys byus.

Partikulu kūpu veidoj divi voi vairuoki vuordi: pīm., nu i ‘nu un’, koč i ‘kaut arī’, lai i ‘lai arī’, kai i ‘kā arī’. Par pīmāru: Nu i navajag, nu i nastuosti, nasalyugšu; koč i nav jis muns dāls, sova paleiga es jam naatsaceišu; lai i nav itys pats šmukuokais puiškins klasē, a maņ jis pateik; kai i jau naseņ saceju, es nu tuo naatsakuopšu.

Piec nūzeimis partikulys var īdaleit niansātuojuos i modalajuos.

Niansātuojis partikulys izsoka īrūbežuojumu, nanūteikteibu, pastyprynuojumu, pavuojinuojumu i t.t. Par pīmāru: partikula viņ – Viņ jū es mīļuoju, viņ jam es ticieju; partikula vysleidza ‘tik un tā’ – Vysleidza es juo napamesšu; partikula tok – Tu tok na mozs bārns; partikula koč – Tymss, koč acī dur; partikula viņ – Jius viņ tī lobī;

Modaluos partikulys izsoka apgolvuojumu, nūlīgumu, vieliejumu i t.t. Par pīmāru: partikula nui ‘jā’ izsoka apgolvuojumu: Nui, es par juo sasnāgumim cīši prīcojūs; partikula najau, anajau izsoka nūlīgumu: Anajau to es jam tū pastuosteju, i najau itei meitine beja atguojuse.

Partikula kab izsoka vieliejumu: Kab koč leits naleitu!

Īvāruosim, ka saleidzynuojumam izmontoj partikulys: kai, nakai, tai kai. Par pīmāru: Lobuok dreižuok iz sātu brauksim nakai taidā trokā ceļuojumā laissimēs.

I maņ ir daguojs laiks īt prūjom voi paceli – kai kuram lobuok pateik, tai i saceisim. Ar tū itys “Volūdys vaicuojums” ir izskaniejs. Paļdis, ka klausejotēs! Vysu lobu!

Dasmytais raidejums (saikli)

Loba dīna!

Latgolys Radejis rubrikā “Volūdys vaicuojums” ar Jums ir Maruta Latkovska.

Šudiņ myusu sarunys temats ir saikli, tys ir, vuordeni, ar kuru paleidzeibu  mes sasaistom teikumus.

Izškir vīnkuoršūs i salyktūs saikļus.

Vīnkuoršūs, saprūtama līta, veidoj vīns vuords: i, a, voi, kab, to, koč, cikom, koleidz i t.t. Par pīmāru: Natici nivīnam, cikom nabyusi redziejuse ar sovys acs; vajag īt, cikom vēļ gaišs.

Salyktī saikli sastuov nu divu voi vairuok vuordu: deļtuo, partū ‘tāpēc’, deļtuo ka, parkū ‘kāpēc’, aizkuo ‘kādēļ’, pa kam ‘pēc kā’. Par pīmāru: Pa kam var pazeit avīkšu kryumu?

Pi salyktūs saikļu pīdar ari divkuoršī saikli: na tik – a i, na viņ – a i, kai – tai, kū – tū, jo – jo, ni – ni. Par pīmāru: Ni ieds, ni dziers aizskrēja iz školu.

Ivāruosim, ka saikli lai lītoj vairuokuos nūzeimēs, izsokūt pamudynuojumu, atļuovi, vieliejumu i tam leidzeigi. Reizem tū aizstuoj ar saikli kab – seviški nūlīguma teikumūs. Par pīmāru: Es saceju, kab juo te vaira nabyutu voi kai tautys dzīsmeitē soka: Globojīs, myus muoseņa, kab tautenis nadabuotu.

Ari saikļu sakarā pasaceņssim atguoduot, ka vajag lītuot saikļus deļtuo, partū, a na puorlyktū tuopēc ‘tāpēc’. Par pīmāru: Beja cīši daudz darbeņa, deļtuo ka paleidzātuoja naatbrauce voi, pīm., Reit byus skaidrys laiks, partū ka saule sorkona nūrītēja.

Taipat saceisim ari deļtuo ka, parkū, na kuopēc ‘kāpēc’. Par pīmāru: Tāvs jūs gaideja vysod, deļtuo ka mīļuoja sovus bārnus. I tys beja pats golvonais, parkū bārni juo naaizmiersa.

Ar tū myusu šudiņdīnys “Volūdys vaicuojums” ir izskaniejs. Paļdis, ka klausejotēs! Vysu lobu!