Nu 25. leidz 27. juļam Ventspilī nūtiks XIII Latvejis Amatīrteatru saliduojums. Ventspiļs piļsātā i nūvodā tiks spielieti 39 nu aizvadeitūs godu veiksmeiguokajim Latvejis amatīrteatru īstudiejumim – dažaidi piec žanra, formys, attāluotuo laikmata, kai ari izteiksmis leidzekļu izvielis. Dalinīku vydā byus ari kolektivi nu Latgolys.

Jau nu 16. leidz 26. juļam Ventspiļs Golvonajā bibliotekā  apsaverama na tik Ventspiļs teatra, nu ari Rēzeknis Tautys teatra izruožu kostimu izstuode. Apmaklātuojim tei atvārta dorba dīnuos 11.00 – 19.00, sastdīnēs 10.00 – 16.00.

Pīktdiņ, 26. julī, Ventspiļs sērfuotuoju pludmalī 21.50 – 22.20 nūtiks saliduojuma atkluošona, nu eistuos izruožu baudeišonys dīnys byus sastdīne i svātdīne, kod tuos vysys dīnys garumā varēs vērtīs vysaiduos vītuos i Ventspiļs piļsātā, i nūvodā.

Sastdiņ 17.00 Puorventys bibliotekā režisora Jurija Loseva īstudātū izruodi krīvu volūdā “Dmitrijs Viltvārdis” ruodeis Daugovpiļs Tautys teatris “Iskateļ”, bet 21.00 Livonejis ordiņa pilī monoizruodi krīvu volūdā “Sasuku mākslinieks” ruodeis Rēzeknis piļsātys Nacionalūs bīdreibu kulturys noma teatris-studeja “Joriks”, režisore Larisa Ščukina.

Svātdiņ 12.00 Ventspiļs Jaunradis noma Lelajā zalā Rēzeknis Tautys teatris ruodeis Mārys Zaļaiskalns īstudātū izruodi “Astoņos pie šķirsta”.

“Treis dīnys vaira nakai 2000 vysaidu profeseju ļauds, kurim pasauļa uztvere i atkluošona caur teatri ir aizaraušona i dzeivis napīcīšameiba, pīpiļdeis Ventspili i Ventspiļs nūvodu ar sovu azartu i prīcu,” stuosta Latvejis Nacionaluo kulturys centra amatīrteatru eksperte Dace Vilne.

Koč i amatīrteatri ir ari Vyspuorejūs latvīšu Dzīšmu svātku dalinīki, tik lela kūpā byušona tikai i vīneigi teatra spālātuojim nūteik reizi četrūs godūs.