2. augustā Laksteigalu solā, Viļānūs, jau 14. godu piec kuortys Tautys muzykantu svātkūs puļcēsīs tautys muzykanti nu Latvejis, Lītovys i Igaunejis i upis krostūs otkon skanēs senejis i jaunys melodejis i vacmeistaru, i myusu dīnu kapelu i folklorys kūpu izpiļdejumā.

Itī ir svātki, kurūs tautys muzykanti – vacmeistari nu vactāva, tāva voi krysttāva īsavuiceituos muziciešonys prasmis i zynuošonys par tautys muziciešonys tradiceju nūdūd jaunuokuos paaudzis muzykantim i sovstarpieji apsamaina i ar melodejom, i vysaidu instrumentu spieliešonys manīrem.

Itūgod Viļānūs pīsadaleis muzykanti-vacmeistari nu Kuorsovys, Viļānu, Daugovpiļs, Ludzys, Bolvu, Baļtinovys, Vileks, Dagdys, Rēzeknis, Salacgreivys, Krimuldys, Saldus, Limbažu, Ventspiļs, Kuldeigys i Strenču nūvodu. Eipaši gosti Viļānūs īsarass nu Pērnavys (Igauneja) – mutis garmaņu orkestris (Piccolo Orchestra), kas spielej i akademiskū, i tautys muzyku tik ar mutis garmani i jau ir puorsteiguši daudzus klauseituojus vysaidūs storptautiskūs konkursūs, teikūt ari pi Baļtejis vaļstu i Zīmeļvaļstu čempionu titulu mutis garmaņu spēlē. Taipat byus vareiba baudeit ari“Mahmor” (Polva, Igauneja) i vairuoku Utenys (Lītova) muzykantu uzastuošona, tymā skaitā Garsonu saimis ansambli, kuri na viņ izpylda, nu ari pietej i kolekcionej lītaunīku tautys muzyku.

Tradicionali Tautys muzykantu svātki tiks īskandynuoti ar vairuokim koncertim Viļānu nūvoda pogostūs, nu 18 stuņdēs vysi aicynuoti iz Tautys muzykantu svātku dižkoncertu Laksteigolu solā, Viļānūs, piec kura sekuos večerinka ar jestrom dzīsmem, ļusteigim dančim i sirsneigom sarunom, partū ka na tik pasuokuma dalinīkim, nu ari skateituojim itei ir vareiba dziļuok izprast sadzeivis muziciešonys tradiceju, muzykantu grupu repertuara veiduošonys sovpateibys, instrumentu spēlis manīri, izgataveišonys i pīlītuošonys īspiejis.

Tautys muzykantu svātkus reikoj Tautys muzykantu bīdreiba, atbolsta Vaļsts Kulturkapitala fonds, Viļānu nūvoda pošvaļdeiba, Viļānu piļsātys dūme, Viļānu kulturys noms, pogostu pošvaļdeibys, krūdzeņš “Pie Kaupra” i cyti.

Svātku PROGRAMA

2014.g. 2. augustā, Viļānūs, Laksteigolu solā

11.00-13.00 Svātku dalinīku īsarasšona, registraceja

14.00-16.00 Koncerti pogostūs (vacmeistari i muzykantu grupys izbrauc muzicēt iz Viļānu nūvoda pogostim):

• Viļānu pog. Radapolē (pi vacuo kantora kuorma)
• Viļānu pog. Jaunviļānūs (daudzdzeivūkļu sātu pogolmā)
• Sokolku pog. Strupļūs (estradē)
• Dekšāru pog. Dekšārēs (estradē)

18.00 – 19.30 SVĀTKU DYŽAIS KONCERTS, Viļānūs, Laksteigolu solā

19.30-22.00 Večerinka (muzicej vysi dalinīki, kotra grupa 20 min)

Seikuoka informaceja par svātkim – Iveta Dukaļska, Tautys muzykantu bīdreiba, t. 29167594, e-posts: ivetadukalska@inbox.lv

Informaceju sagataveja Maija Upeniece, Tautys muzykantu bīdreibys dalineica

Karteņa nu Tautys muzykantu bīdreibys arhiva