Izstuodē byus apsaverami gleznīceibys, grafikys i tekstilmuokslys dorbi, kas radeiti 2013./2014. studeju goda laikā. Daļa nu jaunūs muokslinīku ar izstuodē eksponietajim dorbim puorstuovejuši Latveju plošā storptautiskā izstuodē – konkursā “ART-SESSIO 2014” Vitebskā, Boltkrīvejā. Pīcu vaļstu konkurencē, kas beja puorstuovātys kūpumā ar 267 jaunūs muokslinīku dorbim, Latvejis Muokslys akademejis Latgolys filialis bakalaura programys Grafikys apakšnūzaris 2. kursa studenti Nauris Jefimenoks i Dana Vasiļjeva, kai ari Gleznīceibys apakšnūzaris 3. kursa studente Viktorija Rustamova izceinejuši laureata titulu.

Ar izstuodi Latgolys filialis studenti soka paļdis piļsātai par atbolstu i vareibu pošim aizbraukt iz Boltkrīveju i kluotīnē pīsadaleit vierīneigajā muokslys forumā. Izstuodē apsaverami ari Latgolys filialis bakalaura programys Gleznīceibys i Grafikys apakšnūzaru 2014. goda diplomdorbi, kas tyka teicami aizstuovāti Reigā ituo gods 3. junī.

Latgolys filialis studentim i jaunajim absolventim izstuode “Atvērts” ir vareiba izastuodeit kūpā ar sovim kolegim, desmit talanteigim studentim nu Reigys: Lilitu Bauģi, Elīnu Brasliņu, Askoldu Darnopihu, Ingūnu Levšu, Madaru Neikenu, Aivi Pīzeli, Andu Skadmani, Laimdotu Steķi, Sandru Strēli i Zani Zlemešu. Tys ir eipašs komunikacejis veids, gribiešona īsapazeit tyvuok, jaunys sajiutys, kab caur lokalū tradiceju i globalūs muokslys procesu pīredzi dūtu skateituojam sovu redziejumu iz pasauli i komplicātajim procesiem tymā.