Leidz 24. augustam Latgolys Kulturviesturis muzejā (Atbreivuošonys alejā 102, Rēzeknē) apsaverama fotografa Leonida Važnuo asociativuos fotografejis izstuode “Test of the city & Actress”.

Izstuodis projekts muokslys fotografejā “Test of the city & Actress” apvīnoj divejus fotostuostus: asociativuos fotografejis sereju “Test of the city” i eksperimentaluos fotografejis sereju “Blue Skies & Actress”.

Dorbi, kas pīduovuoti skateituojim serejā “Test of the city” ļaun īraudzeit mums tik pazeistamū apleicejū pasauli nu cyta “skota punkta”, nu cytys pusis. Piļsāta, kas ir radzama iz kartenis pasaver sovaiduokā, cytaiduokā, da šam naradzātā veidā.

“Blue Skies & Actress” projekta pamatā ir vizualitatis pietnīceiba, izmontojūt pastuoveigū i impulsveida apgaismuojums, kuru lītuošonys rezultatā veidojās jauns vizualais tāls, kas eistineibā napastuov fiziski, nu veidojās tik eislaiceigi fotografiešonys procesā, kurs ari teik fiksēts.

“Blue Skies & Actress” foto vizualuo projekta pamatā ir “Blue Sky Research” pietnīciskuo teoreja, tī ir taidi zynuotniskī pietejumi, kur nav nūteikti i formulāti mierki, nav nūteikts pietejuma beigu laiks i nūteikti pietejuma rūbeži.

Asociativuo fotografeja ir taišni saisteita ar cylvāka psihologeju i interesanta ar tū, ka tuos aizdavums ir rūsynuot skateituojā emocejis, puordūmys, kurys ir īlics autors. Tys ļaun skateituojam veiduot pošam sovu dialogu ar attālu.

Izstuodis autors L.Važnais – fotografs, fotografejis pasnīdziejs. Studiejs modernū muokslu Eiropys humanitarajā universitatē Viļņā. Īmīļuotuokais vierzīņs fotografejā – piktorealisms i asociativuo fotografeja, autora lobuokī dorbi ir veiduoti taišni itymā žanrā.