Latvejis Nacionaluo teatra LMT Jaunajā zalā jau trešū sezonu tiks spālāta izruode “Īstā bērnība”, tok itūnedeļ pīsapiļdeis izruodē īsaisteitūs akteru sapyns – par izruodēs savuoktajim leidzeklim jī vysi 16. augustā vess “Īsto bērnību” klasis ekskursejā iz Upeiti.

16. augusta reitā akteri Jānis Vimba, Līga Zeļģe, Ģirts Liuziniks, Inga Misāne – Grasberga, Jānis Āmanis, Arturs Krūzkops, Mārtiņš Brūveris i Marta Ančevska kūpā ar rodūšū komandu dūsīs ceļā ar velosipedim nu Mērdzinis Upeitis cīma mekliejumūs, kab piec ekskursejā labi pavadeitys dīnys sasatyktu ar skateituojim pošu atvastajā izruodē Upeitis Tautys nomā.

“Īstā bērnība” ir pošu akteru izveiduotuo izruožu cykla “Īstais…” turpynuojums, sekojūt īprīkšejuos sezonuos veiksmeigi spālātajom izruodem “Īstie Ziemassvētki”, “Īstie Jāņi” i “Īstais teātris”. Ar saukli – “Ko Tu bērnībā? Mājās?…” akteri īvad skateituojus bārnuduorza, pyrmū skūpstu, mīlesteibys i vysvysaidu pīdzeivuojumu pasaulī. Īprīkš breidynojūt, ka, nesaverūt iz izruodis nūsaukumu, capumim i cukravatu, izruode ir pīaugušajim!

Latvejis Nacionaluo teatra LMT Jaunajā zalā beleti iz “Īstās bērnības” izruodem ir eists ratums, partū ka teik izpierktys lelā uotrumā. Ari iz ituo gods 7. oktobrī plānuotū izruodi beleti strauji tyvojās beigom. Īspiejams, ka taišni iz Upeiti klasis ekskursejā aizvastuo izruode ir vīnkuoršuokuo vareiba tikt pīpraseitajā izruodē.

Izruode “Īstā bērnība” Upeitis Tautys nomā tiks spālāta 16. augustā 20.00, nu interesenti ir aicynuoti pīsavīnuot i akterim velobraucīnī nu Mērdzinis, i Upeitis svātkūs, kur vysaidys nūtikšonys paradzātys vysys dīnys garumā.

Karteņa: nu Latvejis Nacionaluo teatra arhiva