Tramplins festivala “Osvalds” divdesmitgadis svieteišonai
9. augustā Baļtinovā jau deveņpadsmytū reizi izskanieja vacuokais Latgolys festivals “Osvalds”. Ari itymā godā apmaklātuojim tradicionali tyka pīduovuotys treis skotuvis – Tradicionaluo, Zaļumbala-Šlager i Elektroniskuos muzykys skotuve. Tok juopīmiņ, ka pyrmuos divejis mainejušys sovys funkcejis i par Tradicionaluos skotuvis gostim palykuši tī, kas cytā godā nūteikti kuoptu iz Jaunuos skotuvis.
Festivalu iz Tradicionaluos skotuvis atkluoja Rekovys jaunīši, grupa “Napruots”. Klauseituojim beja īspieja taipat ari dzierdēt Lieni Šomasi duetā ar Jāni Moiseju, Smiļtinis pusis apvīneibu “Mākoņstūmēji”, ruodīs ari, ka jau namaineigu festivala vierteibu (kas ari beja sajiutams nu skateituoju atsauceibys), grupu “Tranzīts”, latgalīšus, kuri varātu saceit ari beja ituos skotuvis kulminacejis punkts – “Bez PVN” i grupu “MUSIQQ”. Nūslāgumā jaunīšu grupa “Elektrolīts” nu Bolvu. Par Tradicionaluos skotuvis saiminīku vysa vokora garumā pabeja Ralfs Rubenis.
Iz Zaļumbala skotuvis jau ar pyrmajom notom grupa “Galaktika” īkustynuojuse publiku i vyss zuolis placeits pylns ar doncuotuojim. Taipat bala atmosferā varieja īsajust grupys “Vilx”, “Kreisais pagrieziens”, “Rolise”, “Otto”, Aināra Lipska, Jāņa i Māra Keišu muzykys pavadeibā.
Sovpus cīši tradicionali i namaineigi – škiunī – vītu ījāmuse Elektronyskuos muzykys skotuve. Atzineiba organizatorim i par DJ skotuvis īkuortuojumu – traktora pīkabi, i poša škiuņa pīlāguošonu na tik muzykys, nu ari vizualūs efektu baudeišonai. Par vokora rytmim pasaryupēja – DJ Mārtiņš Kreilis (European Hit Radio), Badly Furnished Room Dj TRIO, Dj Barik, Dj Andre White, Dj BumbleBeat, Dj NuFreak i pošā nūslāgumā vīns nu pasuokuma organizatoru – Dj Čivix.
Festivals itymā godā prīcēja ar leluoku apmaklātuoju skaitu. Cīši truopeigs ruodejuos festivala tāva Māra Lāpāna lītuotais vuords – tramplins. Cerams, ka ituo gods pasuokums i pošim organizatorim, i apmaklātuojim byus lobs īskriejīņa punkts festivala divdesmitgadis svieteišonai nuokušajā vosorā. Iz sasatikšonu augustā Baļtinovā!
Roksta autore: Kristīne Pokratnīce
Karteņu autore: Edeite Husare
