Nu 19. leidz 28. augustam nūtiks storptautiskais festivals – laboratoreja “Telpa – Daugavpils 2014”, kas ir turpynuojums jau paguojušajā godā Daugovpilī aizsuoktajai teatra tradicejai. Koč i itūgod pasuokums ir leluoka mārūga, tok tuo golvonuo ideja ir saglobuota – ar rodūšūs teatra jūmys puorstuovu paleidzeibu tiks “atdzeivynuota” viesturiskuo Daugovpiļs cītūkšņa bejušuo Kara hospitaļa āka.

Festivala laikā Daugovpilī puļcēsīs vysaidi muokslinīki – dramaturgi, režisori, scenografi, nūtiks vysaidys diskusejis, lekcejis ar profesionaļu pīsadaleišonu. Festivala – laboratorejis ītvorūs jaunī i tūpūšī teatra jūmys puorstuovi vīslektoru vadeibā kūpā ar Daugovpiļs teatra akterim radeis 5-15 minutys garys teatra performaņcis. Juoatzeimoj, ka itūgod, atškireibā nu paguojušuo goda, dalinīku vydā byus na viņ muokslinīki nu Latvejis, bet ari nu Ukrainys, Boltkrīvejis i Pūlejis i performaņču idejis tiks rostys Ivana Bunina stuostūs. Pīsaturūt pi tradicejis, par teatralū telpu tiks padareitys na viņ Daugovpiļs cītūkšņa kompleksa ākys, nu ari vysa piļsāta.

Rodūšūs darbneicu laikā festivala dalinīkim i interesentim ari tiks dūta vareiba pīsadaleit īvāruojamu teatra jūmys profesionaļu meistarklasēs. Festivalā jau ūtrū godu piec kuortys pīsadaleis dramaturge Natālija Vorožbita (Ukraina), kura ir vīna nu pazeistamuokajom Austrumeiropys jaunuos dramaturgejis puorstuovem, juos lugys uzvastys Anglejā, Latvejā, Krīvejā i cytur. Taipat vīslekcejis skaiteis Andrejs Urajevs (Krīveja), kusteibu režisors, Krīvejis prestižuos teatra školys MXAT pasnīdziejs, nu pyrmū reizi festivalā gasteis Mihails Ugarovs (Krīveja) – režisors, Moskovys teatra “Teatr.doc” muokslinīciskais direktors.

Itaida festivala nūrise Daugovpilī ir unikala teatra dzeivis nūtikšona, dadūdūt jaunu nūzeimi vīnai nu Daugovpiļs cītūkšņa kompleksa ākom, dūdūt naatkuortojamu pīredzi darbneicys dalinīkim, kai ari styprynojūt jaunaizsuoktū teatra tradiceju Daugovpilī. Festivala muokslinīciskais vadeituojs, jaunais režisors Georgijs Surkovs, kurs itūgod ir “Spēlmaņu nakts 2014” nominantu gūdā  kai “Goda jaunais muokslinīks”, nu juo īstudiejums “Viss ir viņa” nominēts kai “Goda izruode bārnim voi pusaudžim”, uzsver, ka jaunīdybynuotais festivals ir pasuokums, kas aplīcynoj piļsātys miļzeigū rodūšū potencialu i tuos dūtuos vareibys profesionalim.

Festivalā “Telpa – Daugavpils 2014” pīsadola:

Ukraina – režisore Tamara Trunova (Тамара Трунова), dramaturge Oksana Savčenko (Оксана Савченко), scenografs Pjotrs Bogomazovs (Петр Богомазов).

Boltkrīveja – režisors Aleksandrs Marčenko (Александр Марченко), dramaturgs Andrejs Ivanovs (Андрей Иванов), scenografs Andrejs Žigurs (Андрей Жигур).

Latveja – režisore Paula Pļavniece, dramaturge Madara Rutkēviča, scenografe Dace Sloka.

Pūlija – režisors Tomašs Vengorževskijs (Tomasz Węgorzewski), dramaturge Magda Kuprjanoviča (Magda Kupryjanowicz), scenografe Elžbieta Šurpicka (Elżbieta Szurpicka), režisors Kšišeks Popioleks (Krzysiek Popiołek), dramaturgs Damians Donbeks (Damian Dąbek), scenografe Anna Vološčuka (Anna Wołoszczuk).

Vaira informacejis var izzynuot festivala sātys lopā.