Nu 23. leidz 25. septembram Latvejis Nacionaluos bibliotekys Imanta Zīdūņa zalā i Daugovpiļs Marka Rotko muokslys centrā atzeimuos izciluo muokslinīka Marka Rotko 111. dzimšonys dīnu. Itys byus vīns nu “Reiga 2014” nūtikšonu programys “Okeana olkys” projektim ar nūsaukumu “Nu Reigys iz Daugovpili Rotko viļcīnī”.

Dasasaceit var sevkurs interesents, aizpyldūt anketu www.rotkocentrs.lv/rmc/riga2014/lv leidz 16. septembram.

Rotko projekts tiks suokts ar izstuodi “Digitalais i drukuotais fenomens”, kū varēs redzēt ES sātys Reigā Muokslys telpā (1.stuovā) nu 15. leidz 30. septembram.

18. septembrī Latvejis Nacionaluos bibliotekys Imanta Zīdūņa zalā nūtiks kinolektorijs par Marku Rotko i juo rodūšū montuojumu.

23. septembra vokorā Latvejis Nacionaluos bibliotekys Imanta Zīdūņa zalā nūtiks angļu komponista Džeimsa Klārka (James Clarke) muzykys koncerts, kurā dirigenta Mārteņa Ūzuleņa eipaši itam projektam izveiduots Latvejis lobuokūs muziķu kamersastuovs atskaņuos divejus komponista opusus – Untitled No.1 i jaundorbu2014-N, kas raksteits eipaši itam nūtykumam.

23. i 25. septembrī Reigā i Daugovpilī nūtiks storptautiska konfereņce “Abstraktais ekspresionisms: emoceju volūda”, kurā pīsadaleis pasaulī zynomi muokslys zynuotnīki i Rotko īdvasmuoti muokslinīki nu Parīzis, Ņujorkys, Londonys, Madridis, Sanpaulu i Moskovys. Jūs vydā byus vodūšais Marka Rotko pietnīks, britu muokslys viesturnīks Dr. Deivids Anfams (Dr. David Anfam), 360 grādu abstraktūs gleznu meistars i kruosu uztveris psihologejis pietnīks Senfords Vurmfelds nu Ņujorkys (Sanford Wurmfeld), krīvu muokslys kurators i kritikis Viktors Miziano (Victor Misiano), arhitekturys profesors nu Orhūsys Valters Unterainers (Walter Unterrainer), fraņču akademike Annija Koena Solala (Annie CohenSolal), kura prezentēs gruomotys par Marku Rotko izdavumu latvīšu volūdā, kai ari obeji muokslinīka bārni Kristofers Rotko (Christopher Rothko) i Keita Rotko Praizela (Kate Rothko Prizel).

24. septembrī nu Reigys iz Daugovpili ceļā dūsīs Rotko viļcīņs “Klusuma laboratoreja”, kurā byus vareiba pīdzeivuot multimedialu Rotko dramu, sajiutūt klusumu, sataustūt skaņu, nūtverūt šaļti.

24. septembra vokorā Daugavpilī nūtiks multimedeju performaņcis “Rotko īdvasmoj” ar laikmeteiguos muokslys, muzykys i multimedeju simbiozi, kas kulminēs pusnaktī.

25. septembrī Daugovpiļs Marka Rotko muokslys centrā turpynuosīs konfereņce “Abstraktais ekspresionisms: emoceju volūda”. Tiks atkluotys ari jaunuos rudiņa sezonys izstuodis. Skateituojim tiks pīduovuots unikals projekts – izstuode “Latvejis laikmeteiguo gleznīceiba”, vīnkūpus paruodūt atškireigū i kūpeiguo ituos šaļts Latvejis gleznīceibā septeņu Latvejis gleznuotuoju – Sigitys Daugulis, Juoņa Dukāta, Andra Egleiša, Daigys Krūzis, Viktorijis Valujevys, Andra Veituleņa i Otto Zitmaņa – skatejumā. Kluotyn byus apsaverami Īrejis gleznuotuojis Kristīnys Hakslijis (Kristina Huxly) dorbi, kai ari tiks atkluota Lelbritanejis muokslinīka Pītera Grifina (Peter Griffin) dorbu izstuode i storptautiskuos rezideņcis “Mark Rothko 2014” skate.