Nu 5. leidz 30. septembram Latgolys viestnīceibā GORS byus apsaverama Latvejis Muokslys akademejis vuiceibspāku izstuode “Rīga – Rēzekne – Rīga”. Ekspoziceju veiduos Reigys i LMA Latgolys filialis pedagogu dorbi. Izstuode tiks atkluota 4. septembrī 17.00.

Latvejis Muokslys akademejis rektors profesors Aleksejs Naumovs izstuodi raksturoj kai vīnuotu vasalumu, kurā sasateik Reiga i Rēzekne, i tei īzeimuos jaunuo vuiceibu goda suokumu, kas tiks pavadeits cīšā sadarbeibā. Rektors nūruoda, ka byutiskai jaunajim studentim i plašuokai sabīdreibai paruodeit akademejis personeibys, kab vīnuvīt īraudzeitu, kai jī struodoj, kūpeigū i atškireigū jūs dorbā, kai ari veiduot pamatu mijīdarbeibai ar studentim. Naumovs uzsver, ka studentu diplomdorbi teik radeiti kolegialā kūpdorbā ar pasnīdziejim, partū studentim byutiskai redzēt, kaidā vierzīnī pasnīdzieji struodoj, kab poši rostu vareibu atrast sevi muokslā.

Rektors atzeimoj, ka dūšonuos 240 km nu Reigys, kab eksponātu akademejis pasnīdzieju dorbus, ir cīši saisteita ar akademejis mierki veicynuot muokslys pīejameibu, kai ari akcentēt Latvejis Muokslys akademejis Latgolys filialis izcilū i leidzvierteigū leimeni muokslys izgleiteibā i plošuok – muokslys scenā.

Latgolys filialis vadeituoja Ilma Rapša stuosta, ka ideja par izstuodi Rēzeknē lūluota ilgi, tok materializiejusēs pasasokūt Latgolys filialis studentu pamudynuojumam i rektora atsauceibai.

Izstuodē pīsadola: Aija Baumane, Kristians Brekte, Vjačeslavs Fomins, Elīna Ģibiete, Māra Kalniņa, Ieva Krūmiņa, Daina Manuško, Jānis Murovskis, Aleksejs Naumovs, Juris Petraskēvičs, Guntars Sietiņš, Aivars Sprūdžs, Andris Vītoliņš, Kristaps Zariņš, Anatolijs Zelčs i Osvalds Zvejsalnieks.

Atguodynojam, ka nu 1. augusta leidz 3. septembram Latgolys viestnīceibā GORS apsaverama ari Latvejis Muokslys akademejis studentu izstuode “Atvērts”, ar kuru īsuokta Latvejis Muokslys akademejis i GORA veiksmeiguo sadarbeiba.