13. septembrī Latgolys viestnīceibā GORS Rēzeknē un 14. septembrī Muzykys nomā DAILE Reigā byus multimedialys operys pasticcio „Māja Mītelim” pyrmizruodis, kas teik reikuotys festivala 10. Baroka muzykys dīnys Rēzeknē (BMD) laikā.

Rēzeknē, Rogovkā i Rīgā no 9. leidz 14. septembra nūteik festivala 10. Baroka myzykys dīnu Rēzeknē pasuocīni – kamerkoncerti, lekcejis, meistarklasis i ari jauna izvaduma – operys pasticcio pyrmizruode. 10. Baroka muzykys dīnu temu caurvej baroka laika komponista Johana Gotfrida Mīteļa personeiba i dorbi. Opera pasticcio „Māja Mītelim” ir stuosts par izcyluo komponista dzeivi 18. godusymta Reigā i juo vītu, juo „sātu” cylvāku apziņā šudiņ. Rēzeknis režisoris Mārys Zaļaiskalns dziļdūmeigais skatejums iz komponista personeibu atkluoj juo dzeivis leluokū dramu: voi i kai raksteit muzyku, ka tovs školuotuojs ir bejs genialais Bahs i ka tovu muzyku publika ni par reizi sagaida ar ovacejom.

Mītelis – nūslāpumainais, nesaprostais vīntuļnīks, kura dzeive vaira izdūd vaicuojumus nakai dūd atbiļdis. Voi zeimūgs „Baha škoļnīks”, kas Mītelis vysur īt leidza, nanūmuos poša komponista personeibu? Voi tys naizlīk par daudzi lelu pīnuokuma nostu? Voi ir vīgli byut „geneja škoļnīkam”? Voi Mītelis beja sasaskuors ar latvīšu tautys kulturu, eipaši ar tautysdzīsmem i voi tuos pamete īspaidu iz juo radūšū darbeibu?

Taipat kai nav zynoma i laiku gaitā ir pagaisuse J. G. Mīteļa kopavīta, ari juo padareitais vēļ nav atrads i ījēms stabylu vītu Latvejis muzykys ainovā. Ituo goda festivalā BMD Rēzeknē programa īruoda Mītelim itū vītu Latvejā, itū „Māju Mītelim”.

Izvadums „Māja Mītelim” taiseits kai opera pasticcio aba „opera pastete”. Itaids operys paveids rodīs taišni baroka laikā Italejā i īrosts apvīnoj dažaidu komponistu skaņdorbu fragmentus. Rēzeknīšu taiseituo opera byus multimedials izvadums, kurā sasatiks Johana Gotfrīda Mīteļa skaņdorbi ar Cīrihē dzeivojūšuo vuocīša Burkharda Kinclera originalmuzyku i Mīteļa solodzīšmu myusdīneigajim apdarynuojumim, šveicīša Vincenta Flikigera semplu kompozicejis datoram i latgalīšu tautysdzīsme.

Operā pasticcio „Māja Mītelim” uzastuos storptautysku atzineibu dabuojušī senejuos muzykys interpreti, kurī jau vaira reižu uzastuojuši BMD koncertūs. Opera taiseita taišni itam festivalam, i tei ir „Kesselberg Ensemble” projekts, kas taiseits sadarbeibā ar Latgolys viestnīceibu GORS, Juoņa Ivanova Rēzeknis muzykys vydsškolu i Rēzeknis Tautys teatri i kas ir veļteits festivala Baroka muzykys dīnys Rēzeknē i „Kesselberg Ensemble” 10 godu jubilejam.

Muzyka: Johann Gottfried Müthel, Burkhard Kinzler, Vincent Flückiger

Izvaduma taiseituoji i dalinīki:
Ilze Grudule –muokslinīcyskuo vadeituoja
Māra Zaļaiskalns – režeja

Marts Mihailovs – akteris, video
Sergio Azzolini – baroka fagots
Aija Veismane – soprans
Hugo Naessens – kontratenors
Joost van der Linden – tenors
Raitis Grigalis – baritons
„Kesselberg Ensemble“ (Bazele, Šveice)
Juoņa Ivanova Rēzeknis muzykys vydsškolys kors, vad. Anda Lipska
Ināra Apele – kostjumi
Daina Salmiņa – scenografeja
Ervīns Šaicāns – gaismys