12. septembrī, Reigys īlys svātkūs, Kruoslovys sirdī atkluoja kasgadejū fotopleneru “Kruoslova” i ostonis viesturiskys lelformata kartenis. Senejuos Kruoslovys pīejameiba vītejim i gostim ir foto kluba “Zibsnis” iniciativa.

Ideja īguoja pruotā kluba bīdrei Ingai Pudnikai: “Reitūs ībraucūt piļsātā ar sabīdriskū autobusu i radzūt tukšuos restis iz “Sapņa” ākys, nūdūmuoju – izcila vīta karteņom!”

Tūlaik pozitivu rezonansi sabīdreibā raiseja Kruoslovys nūvoda dūmis izdūtais kalenders ar senejuos Kruoslovys nu jau pagaisušajim skotim i cylvākim, partū kluba bīdri beja puorlīcynuoti – karteņom juobyut dokumentalom. “Mums pasaveice, ka ideja īdvasmuoja zemnīku saimisteibys “Sapnis” īpašnīkus, Rītumu Bankys lobdareibys fondu, Kruoslovys nūvoda dūmi i golvonais – sabīdreibu,” stuosta projekta vadeituoja Gunta Čižika, ”idejis realizacejā sovu dorbu i energeju īguļdeja daudzi cylvāki i organizacejis, asam jim pateiceigi par entuziasmu i atbolstu!” Kūpā dorbojūtīs panuokts taustams rezultats – piļsātys centrs ir dzeivuoks i latvyskuoks. Efekteigi kartenis izavērs naktī, partū ka nūvoda dūme apsajāmuse nūdrūšynuot karteņu apgaismuojumu.

Nu jau par tradiceju palykušais, leluokais sabīdreibai pīejamais foto pasuokums – fotopleners “Kruoslova”, turpynuojuos ari 13. i 14. septembrī. Tradicionali vīnu dīnu veļteja lekcejom i nūdarbeibom, ūtrajā – īpazeistynuoja ar Kruoslovys nūvodu vītejūs i gostu fotografus.

Reigys īlys dīnys Kruoslovā kolpuoja par īdvasmys olūtu itūgod pīsavērst piļsātvidei, arhitekturai, interjerim i kulturviesturei. 13. septembrī Kruoslovys kulturys nomā pleneristi tyka pi zynuošonu par piļsātvidis kartenis tipologeju Aivara Buļa vadeibā, īsadzilinuoja Kaspara Freimaņa atkluotajūs kadriešonys nūslāpumūs, aizrauteigi fotografēja Kulturys noma interjeru Anatola Kauškaļa meistarklasē i izstruoduoja sovu fotostuosta scenareju kūpā ar Reini Fjodorovu.

Vierteiga pastaiga pa Kruoslovu izavērte režisora Andreja Jakubovska vadeibā, dūmuos vizualizejūt scenareja meistara vuordu kartenis i teikūt pi īdvasmys individualim fotoprojektim.

Praktiskuo darbeiba turpynuojuos 14. septembra reitausmā, īpazeistūt eipašu vītu Latvejis suokumā – Indru. Fotografi īmyužynuoja pasamūdušu brīdi, austūšū sauli, viļcīņu mūdynuotu cīmatu i devēs iz Indrys ausšonys darbneicu “Indrys Pyuraluode”.

Indrys audiejis i kulturys darbineicys fotografus sagaideja ar kiupūšu kopeju i īpazeistynuoja ar cīma viesturi i omota nūslāpumim. “Kod nakod ir tik svieteigai izīt uorpus sev īrostuos kasdīnys dzeivis. Aizbraukt iz cīmu, kas atsarūn Latvejis suokumā, kab satyktu Cylvāku. Cylvāku, kas aizraun, īdvasmoj i līk prīcuotīs par tū, ka mums kluotyn dzeivoj tik stypri, tik dzeiveigi, tik rodūši, tik apbreinuojami Cylvāki. Ar osu pruotu. I vīdu sirdi. Radzūši i dareit grybūši,” sovys emocejis piec tikšonuos ar audieju Reginu pauž Valija Platace, i itei atkluosme mūdynoj ari “Zibšņa” gondarejumu par padareitū, partū ka ari foto kluba veikuma pamatā ir cylvāki, idejis i dorbs.

Plenera nūslāgumā, mīlojūtīs ar korstim blīnim i svaigi vuoreitu īvuorejumu, kluba bīdri i draugi atzeimuoja “Zibšņa” pīktū dzimšonys dīnu ar prīcu secynojūt, ka kūpeiga dorbuošonuos ir dzeivuotspiejeiga, pošim i sabīdreibai vajadzeiga.

Eipašs paļdis par sadarbeibu pasuokumu eistynuošonā Inesei Urbānei, Larisai Bārtulei, Juoņam Geibam, Arkādijam Petaško, Anatolam Kauškalim, Valdai Timulei, Anželai Kuzminskai, Inārai Dzalbei i Vilim Stivriņam.