Itūgod paīt 150 godi nu gareidznīka, literata, vaļstsveira i sabīdryskuo darbinīka Fraņča Trasuna dzimšonys. Nūtikšonai par gūdu 30. oktobrī 18.00 Latgolys viestnīceibā GORS pyrmū i vīneigū izruodi pīdzeivuos literari muzykalais jaunīstudiejums “Francis”, kurymā tiks atkluotys Trasuna dzeivis i dorba puslopys.

Īstudiejuma “Francis” autori – režisore Māra Zaļaiskalns, dzejneica Anna Rancāne, muzykaluo konsuļtante Ilona Rupaine. Īstudiejumā pīsadaleis akteri Oskars Lustiks, Aldis Leidums, Jurģis Lipskis i Inga Drele, deju kūpys “Dziga” doncuotuoji, Juoņa Ivanova Rēzeknis muzykys vydsškolys jauktais kors Andys Lipskys vadeibā i cyti. Literari muzykalū īstudiejumu spylgtuoku padareis ari Zanis Pumpuris-Prāmnīcys “Smilšu kino” smiļkts zeimiejumi.

Fraņcs Trasuns dzims 1864. goda 16. oktobrī i bejs īvarojams latgalīšu i latvīšu kulturys i gareigais darbinīks, vaļstsveirs i literats. Vysu myužu nūsadorbuojs ar latgalīšu volūdys i kulturys aizstuoveibu. “Fraņcs Trasuns īlyka myusu Latvejis gierbūnī trešū zvaigzni – Latgolu,” paglobojūt Trasunu saceja Vaļsts prezidents Juoņs Čakste.

“Fraņcs Trasuns beja pyrmais latgalīts, kas vaicuoja i atroda ceļu iz sasaprasšonu storp diveju škiertu myusu tautys daļu. Sovā skaidrā i gaišā politiskā gaitā jis vysod tyvuok guoja tautys plašai masai i juos dvēselei; tyka ari jis demokratiskuoks i progresivuoks. Taida gaita dūta tik rešam,” raksteja Raiņs.

Koč ari Trasuna dzeivis i dorba davums ir nanūviertejams Latvejis vaļsts viesturis koņtekstā, vys tik par juo padareitū ir moz zynoms uorpus Latgolys regiona. Vaira Trasuna vuords otkon izskanieja pārn leidza ar rakstneicys Ingys Uobelis romana “Klūgu mūks” izīšonu, kur Fraņcs Trasuns ir romana golvonuo varūņa prototips.

Frančam Trasunam veļteitū īstudiejumu reikoj “Rēzeknis Latgalīšu kulturys bīdreiba”. Beletus iz tū var nūpierkt Latgolys viestnīceibys GORS kasē i “Biļešu Paradīzes” kasēs vysā Latvejā.

Īstudiejuma “Francis” topšonu atbolsta Vaļsts Kulturkapitala fonds i Rēzeknis piļsātys dūme.