Sastdiņ, 25. oktobrī, 10.30 nu reita, Reigys Kongresu noma 215. auditorejā nūtiks latgalīšu autoris Ilzis Spergys debejis stuostu kruojuma “Dzeiveiba” attaiseišonys svātki.

Stuostu kruojumā “Dzeiveiba” apkūpuoti deveni da šam napublicāti ci škārsteiklā fragmentari publicāti stuosti myusdīnu latgalīšu rokstu volūdā. Gruomotys redaktore ir Anna Rancāne, gruomotys izdeviejs – SIA “Cymuss”.

Nasaverūt iz tū, ka gruomotā apkūpuotī stuosti ci jūs fragmenti škārsteiklā da šam ir bejuši gryuši atrūnami i pīejami tik zynuotuojim, jī vairuok reižu ir atzeiti par lobuokū latgalīšu prozu i sajāmuši Latgalīšu kulturys goda balvu “Boņuks”: “Stuosts par suneiti” – 2008. godā, “Kopu svātki” – 2010. godā, “Puika mežā” – 2012. godā.

Kai atzeist Ilze Sperga: “Munu tekstu deļ babys ir klīgušys bazneicā i čut ni atsasacejušys nu „Katōļu Dzeivis” abonementa. Cytys ir smiejušuos da osoru, cytys rauduojušys nu dusmis. Tai ka sova auditoreja ir veiksmeigi atrosta. Tai kai rokstu es sev, varu raksteit sevkurā volūdā. I sev es rokstu latgaliski. Tei ir breiveiba sasaceņst ar sevi i sovu volūdys izjiutu.”

Gruomotys redaktore Anna Rancāne stuostu kruojumu “Dzeiveiba” sauc par Latgolys styprūs stuostu gruomotu: “Ilzis Spergys stuostūs dzeivoj mozī ļauds. Tī, par kurim jau Svātajūs Rokstūs saceits, ka taišni jim Dīvs atkluojs dabasu vaļsteibys nūslāpumus. I bāda asūt tim, kuri apkaitynuos koč vīnu nu itim mozajim. Ilzis stuostu varūni tuo nazyna, a varbyut viņ nūjauš, partū ka kai cytaiž jī tik atkluotu i skaidru sirdi tycātu liktiņam i pasauļam, koč jis  pret jim ir bejs gona borgs, tik borgs, ka nasagrib pat ticēt, ka taidi cītieji mozī ļauds ir tepat myusim sūpluok.  Ka ir juosaleidzynoj ar kaidu latvīšu literaturā jau asūšu personažu, tūlaik varbyut I. Spergys Pīters (stuostūs “Kur sauleitei sāta” i “Deputats”) i Puika nu stuosta “Puika mežā” varātu byut leidzeigs Cibeņam voi Dullajam Daukam? Tik itī latgalīšu bārni ir stypruoki, partū ka apsazynoj – jim ir sovs pesteituojs dabasūs, ka nav tepat iz zemis. Ari tom sīvītem, styprom i grieceigom kai rudiņa zuolis, ar mēli osu kai ņuotris i dodzi, I. Spergys stuostūs ir sovs eņgeļs. Deļtam nu stuostu īt taida rudiņa mikriešļa gaisma, dyumakaina, bet sylta. Ari nu senatneigi teiruos latgalīšu volūdys, ak jau tepat pi babu i vaciku dzierdātys i napagaisynuotys, jaunuokuos paaudzis mutē īlyktys! Šaļtim skaitūt izīt gryutums viersā, nu tik skaudra dzeivis materiala, bet gruomotys nūsaukums ir Dzeiveiba, i tys līcynoj, ka vyss tok gols golā pasagrīzs iz gaišū pusi. Itī ir stypruos Latgolys styprī stuosti.”

Stuostu kruojuma “Dzeiveiba” atkluošana byus vīns nu Reigys Gruomotu svātku pasuokumu. Reigys Gruomotu svātki Reigys Kongresu nomā, Reigā, Krišjuoņa Valdemāra īlā 5, nūtiks nu 24. da 26. oktobra. Jūs laikā struoduos ari bīdreibys “Latgolys Studentu centrs” organizātais latgalīšu gruomotu golds, kur varēs īsapazeit ar dažaidu izdevieju pasaulī laistim izdavumim i nūpierkt ar Latgolu i juos ļaudim saisteitys gruomotys latgalīšu i cituos volūduos.