Latgolys Kulturys centra izdevnīceibā izdūta atkuortuota i papyldynuota gruomota “Francis Trasuns. Runas”, kurā apkūpuotys Trasuna runys Latvejis Republikys Satversmis sapuļcē, kai ari 1. i 2. Saeimā. Gruomotā ari Pītera Zeilis prīškvuords, kai ari Zeilis i Vladislava Malahovska komentari. 

Gruomotys attaiseišonys svātki paradzāti 30. oktobrī 16.00 Latgolys viestnīceibys GORS 2. stuovā. Iz nūtikšonu aicynuoti gruomotu izdeviejs Juoņs Eļksnis, runu komentaru autors viesturnīks Vladislavs Malahovskis, kai ari Saeimys i vītejūs pošvaļdeibu deputati.

Kai jau viesteits īprīkš, piec gruomotys attaiseišonys nūtiks literari muzykaluo īstudiejuma “Francis” pyrmuo i vīneiguo izruode, kurymā tiks atkluotys Trasuna dzeivis i dorba puslopys.

Īstudiejuma “Francis” autori – režisore Māra Zaļaiskalns, dzejneica Anna Rancāne, muzykaluo konsuļtante Ilona Rupaine. Īstudiejumā pīsadaleis akteri Oskars Lustiks, Aldis Leidums, Jurģis Lipskis i Ināra Apele, deju kūpys “Dziga” doncuotuoji, Juoņa Ivanova Rēzeknis muzykys vydsškolys jauktais kors Andys Lipskys vadeibā i cyti. Literari muzykalū īstudiejumu spylgtuoku padareis ari Zanis Pumpuris-Prāmnīcys “Smilšu kino” smiļkts zeimiejumi.