16. novembrī Latgolys viestnīceibā GORS byus jau par tradiceju palykušuo latvīšu kinu dīna, kurā arī interesenti Rēzeknē beidzūt varēs nūsavērt animacejis kinu – puosoku vysai saimei “Zalta zyrgs” (“Zelta zirgs”).

Kluotyn animacejis kinai, latvīšu kinu dīnā tiks izruodeita dokumentaluo kina par režisori Muoru Kimeli “Muora” (“Māra”) i dokumentaluo kina “Ej ar mani padoncuot” (“Nāc ar mani padejot”), kas radeita X Latvejis školu jaunatnis dzīšmu i deju svātku laikā.

16. novembrī 12.00 nūtiks režisora Reiņa Kalnaeļļa animacejis kina “Zalta zyrgs”, kas radeita piec Raiņa lugys “Zalta zyrgs” motivim. Kinys stuosts: Malnuo muote rauga sagruobt varu puor pasauli, vairoj skumis i kruoj osorys nu vysim, kas raud par naveiksmem, nalaimem i aizguojiejim. Vacuo rogona gryb nūbeņdēt Princesi, partū ka tod rauduotu vysa karaļvaļsts i Malnuo muote dabuotu absolutu varu. Kod karaļmeita dūdās izjuodē pa mežu, rogona sagiustej meitini i īslādz Princesi stykla grobā. Dzeiveibys aizstuovs – Boltais tāvs stuojās ceļā i roda naīspiejami stuovu i augstu lada kolnu, kas septeņus godus i septenis dīnys pagluobs Princesi nu Malnuos muotis. Voi pa tū laiku drūsminīki var princesi izgluobt!? Animacejis kinys “Zalta zyrgs” seanss paradzāts ari 21. novembrī 12.00.

14.00 byus režisoris Kristys Burānis dokumentaluos kinys “Muora” izruodeišona. Kina dzeivoj leidza režisoris Muoras Kimelis attīceibom ar babu, dālu i dorbu, dokumentejūt teatra kai narealys realitatis tapšonu na tik iz skotuvis, nu ari kasdīnys dzeivē. Vysi ituos dokumentaluos kinys varūni tāloj – cyti vairuokys lūmys, cyti ari poši sevi. Kina ir na tik par izcylu teatra personeibu, nu ari par Sīvīti, muoti, rodūšu personeibu.

15.30 nūtiks režisora Dzintara Dreiberga dokumentaluos kinys “Ej ar mani padoncuot” seanss. Kina ir radeita X Latvejis školu jaunatnis dzīšmu i deju svātku laikā, kod filmiešonys grupa septenis dīnys i nakts sekuoja leidza deju kolektiva vacuokūs klašu grupai – mieginuojumūs, koncertūs, Reigā pavadeitajā svātku kasdīnā i balleitēs. Nu dabuotuo materiala ir radeita 45 min gara dokumentaluo kina, kas atspīgeļoj unikalys nūtikšonys nu myusu dīnu jaunīšu dzeivis, tautys deju kolektiva kasdīnys i dzīšmu i deju svātku aizkulisem.

Īīšonys beleti iz latvīšu kinu dīnys seansim nūpierkami Latgolys viestnīceibys GORS kasē i www.latgalesgors.lv. Beletu cenys 2,00 i 3,00 €.