Vineta Vilcāne, LV portāls

Vaicuojums par latgalīšu volūdys statusu izskaņ arviņ bīžuok i skaļuok. Voi oficialuo saziņa latgalīšu volūdā ir īspiejama: voi deputats zvārastu dreikst dūt latgaliski, voi sovā pošvaļdeibā var vērstīs ar īsnīgumu latgalīšu rokstu volūdā i tymā sajimt atbildi, voi var registrēt bīdreibu, kurys statuti sastuodeiti latgalīšu rokstu volūdā?

Diskuseja vīnleidz aktualizej ari vaicuojumu, cik lelā mārā vaļsts eistynoj sovu apsajimšonu par latgalīšu rokstu volūdys saglobuošonu, aizsardzeibu i atteisteibu. Latgalīši uzskota – vaļsts dora par moz – i kliust uzstuojeiguoki.

Latgalīšu volūdys statuss ir dīzgon sovpateigs, jo lykumā latgalīšu rokstu volūda nūteikta kai latvīšu volūdys paveids, sovukuort tīsa dokumentu, sastateitu latgalīšu rokstu volūdā, atzynuse kai raksteitu svešvolūdā.

Volūda – latgalīšu ideņtitatis pamats

Latgalīšu volūda ir naatjamama Latvejis kulturviesturiskuo montuojuma daļa, i varam justīs lapni, ka par speiti dažaidu varu centīnim izskaust tuos lītuošonu, latgalīšu volūda kai daļa nu latvīšu volūdys ir sasaglobuojuse da myusu dīnom. Pošim latgalīšim sova dzymtuo volūda ir nūzeimeigs ideņtitatis pamats, kas ļaun apsazynuot sovu unikalitati i vīnlaikus pīdereibu latvīšu tautai, napozicionejūt sevi kai koč kū atškireigu nu puorejim latvīšim.

Pādejū godu aktivitatis skaidri aplīcynoj, ka latgalīšu volūda nav arhaisms, kurā runoj tikai vacuomuote dzili dzeraunē, voi kas izskaņ dīvkolpuojumā tradicejis piec. 2011. godā nūtykušuos tautys skaiteišonys dati līcynoj, ka latgalīšu volūdu kasdīnā lītoj 8,8% vaļsts īdzeivuotuoju.

Pylnu rokstu latvīšu literarajā volūdā skaiti lvportals.lv/267001-kads-isti-ir-latgaliesu-valodas-statuss/