30. novembrī 16.00, pyrmajā adventa svātdīnē, Latgolys viestnīceba GORS aicynoj iz Zīmyssvātku gaideišonys laika īskanis koncertu “Pyrmuo advente”, kurymā pīsadaleis Rēzeknis i Reigys jaunī muziki, pīduovojūt Zīmyssvātku gaideišonys laika muzyku solistu, koru, klavīru, vargaņu i kamerorkestra skaniejumā.

Svātku programu saryupiejuse Reigys Doma kora škola, J. Ivanova Rēzeknis muzykys vydsškola (JIRMV) i Rēzeknis kamerorkestris (dir. Juoņs Stafeckis). Koncertā skanēs gon latvīšu, gon cytu vaļstu komponistu dorbi solo izpiļdeituojim, koram i kamerorkestram. Pyrmajā adventa svātdīnē Rēzeknē izskanēs E. Dārziņa, Š. M. Vidora, S. Rahmaninova, R. Stivrinis, J. Vaivoda, V. Pūcis, H. Pavasara i c. komponistu dorbi. Taipat klauseituojus otkon gaida sasatikšona ar R. Dubrys “Tu skaistuo Dīva duorza rūze”, kas JIRMV jauktuo kora (dir. Anda Lipska) aizkustynūšajā izpiļdejumā izskanieja ari literari muzykaluo izvaduma “Francis” finalā. Svātku koncertā Zīmyssvātku šyupeļdzīsmis dzīduos JIRMV bārnu kors, nu koncerta kulminacejā vysu dalinīku snāgumā byus baudoma komponista Ē. Ešenvalda kantate “Ziesmassvētku vakarā” i rēzeknītis I. Rupainis ituo goda svātku laikam par gūdu saraksteituo kantate “Nosapņotie Ziemassvētki”.

J. Ivanova Rēzeknis muzykys vydsškolys i Reigys Doma kora školys sadarbeiba ilgst jau vaira godu. Ir nūtykuši vairuoki školu kolektivu sadraudzeibys koncerti Reigā i Rēzeknē. Pyrmuos adventis svātku koncertā obu školu muziki pyrmū reizi sasatiks iz Latgolys viestnīceibys GORS Leluo zala skotuvis.

30. novembrī paradzātais koncerts reizē ir ari Latgolys viestnīceibys GORS aizsuoktuos tradicejis turpynuojums – kai riezeknīšim, tai piļsātys gostim atruodeit i paruodeit vītejūs muziķu, dzīduotuoju, komponistu breineigū snāgumu i muzykaluos variešonys augstū leimeni.

Beletus iz koncertu var nūpierkt Latgolys viestnīceibys GORS kasē i “Biļešu Paradīze” beletu sistemā. Beleta cena – 3,00 €.