Leidz 8. decembram Rēzeknis nūvoda pošvaļdeibys ākā, Atbreivuošonys alejā 95a, sevkurs riezeknīts i piļsātys gosts laipni aicynuots apsavērt fotoizstuodis – socialuo projekta “Rūkys” muokslys i dokumentaluo foto dorbus. Rēzekne ir vīna nu četru Latvejis piļsātu, kur itymā rudinī radzams unikalais foto projekts. Izstuodei “Rūkys” sovus dorbus zīduojuši vaira nakai desmit Latvejā labi zynomu fotografu. Tuos mierkis ir paruodeit rūku i kusteibu nūzeimi cylvāka dzeivē, reizē aicynojūt ryupētīs par sovu veseleibu, aizadūmuot par suopem i tūs ītekmi iz kasdīnu.

Socialajā projektā “Rūkys” Latvejis fotografi pīsadola jau ūtrū godu. 2014. goda izstuodē “Rūkys” pīsadola Natālija Gusakova, Aigars Jansons, Karīna Jurciņa, Dagmāra Legante, Edijs Pālēns, Anrijs Požarskis, Evija Trifanova, Klāvs Vasiļevskis, Zigismunds Zālmanis i Ilmārs Znotiņš. Fotografu dorbi ruoda vysaidu vacumu, socialūs sluoņu, profeseju cylvāku rūkys voi kusteibu kai taidu. Izstuodē dokumentieta ari ar reimatiskajom saslimšonom slymojūšu cylvāku kasdīna. Fotografi pastuostejuši vairuoku personeibu dzeivisstuostus, sadzeivojūt ar vysaida veida reimatiskūs saslimšonu izpausmem.

Fotografu veiduotī stuosti apguož stereotipus, ka artrits ir tik vacu ļaužu slimeiba. Izstuodē “Rūkys” radzamī foto stuosti dūd vareibu īpazeit reimatiskūs slimeibu nesaudzeigū dobu, ruoda personeibu gora spāku i vēļmi izdzeivuot dzeivi vysmozuokajūs seikumūs, sasnādzūt sovus mierķus. Fotoizstuodi – socialū projektu “Rūkys” eistynoj Latvejis Kaulu, lūceitovu i saistaudu sliminīku bīdreiba (LKLSSB) sadarbeibā ar SIA “Roche Latvija”.

Izstuode, suocūt nu 2014. goda oktobra, kod vysā pasaulī atzeimoj mienesi ceiņai ar reimatiskajom saslimšonom, ir bejuse radzama Reigā, Valmīrā i Tukumā, kur sajāmuse tuos apmaklātuoju nadaleitu atzineibu. Reigā, Galerejā Centrs, izstuodi kotru dīnu skateja vaira nakai 20 000 Reigys dzeivuotuoju i piļsātys gostu, kas apmeklēja galereju, tai var secynuot, ka izstuodi redzējuši kopumā vaira nakai 200 000 cylvāku. Sovukuort Valmīrā, Valmīrys Kulturys centrā tū apsavāruši gondreiž 10 000 interesentu. Ari Tukuma dzeivuotuojus izstuode uzrunuojuse i bejuse labi apmaklāta. Rēzekne ir piļsāta, kurymā itūgod nūsaslēgs ceļojūšuo socialuo projekta – fotoizstuodis “Rūkys” ceļš.

Socialuo projekta i izstuodis “Rūkys” veiduotuoji foto izstuodi izavieliejuši kai eipašu formu, kas atguodynoj, ka reimatoidais artrits var suoktīs sevkurā vacumā, tok puorsvorā ar tū slymoj cylvāki vacumā nu 25 leidz 55 godu. Skaita, ka Latvejā trešdaļa dzeivuotuoju sasaskar ar vysaidom reimatiskajom saslimšonom, kas ītekmej jūs dzeivis kvalitati, spieju struoduot, sportuot, veikt visdažaiduokūs kasdīnys pīnuokumus. Juoatzeimoj, ka sīvītis itei slimeiba skar divejis leidz treis reizis bīžuok nakai veirīšus. Apmāram 15% reimatoiduo artrita sliminīku ir smoga slimeibys forma, kam rakstureigys narymstūšys lūceitovu suopis i iztyukums, smoga invaliditate i funkcionalūs spieju zudums. Lūceitovu suopis, steivums, īrūbežuots kusteigums pacientim īrūbežoj spieju veikt kasdīnys aktivitatis i roda dorba naspieju.

Vaira informacejis par muskuloskeletaluos sistemys slimeibom var dabuot sātys lopuos www.artrits.lv i www.reimatik.lv