Leiksnys pogosta kulturys nomā vysu decembri apsaverama muokslineicys Anitys Karpenko izstuode “Bārnu pasaule”.

Bārni ir myusu nuokūtne. Bārns īīt itymā pasaulī kai sovu dzymdynuotuoju prīca i ocuraugs. Sevkura vacuoku, vacvacuoku i cytu tyvinīku dūma nu ituos šaļts rūn jaunu epicentru. Ka bārna dzeive byutu atkareiga tik nu tyvynīku lobuos grybys, tei byutu tik tyva idealam, cik viņ īspiejams. Muokslineicai Anitai kotra dīna teik pavadeita ar bārnim, vārojūt, kai jī kustuos, kai dūmoj, kai smaida. Partū sovūs dorbūs autore raudzeja izveiduot bārnu pasauli, kurā teik attāluoti bārni vysaiduos emocejuos. Itei ir muokslineicys pyrmuo gleznīceibys personalizstuode.

Anita Karpenko ar muokslu aizaraun jau nu bierneibys, tok nūpītni itai jūmai pīsavērse viņ izsuocūt vuiceibys Daugovpiļs Dizaina i muokslys vydsškolā “Saulis škola”, kur vuicejuos tekstildizainera profeseju. Tuoluokais izgleiteibys ceļš autori aizvede iz Daugovpiļs Universitati, kur tyka dabuots bakalaura grāds muokslā i vizualuos muokslys školuotuojis profeseja, kas niu nūder struodojūt ar bārnim Špogu i Kraujis muokslys školuos. Itūšaļt Anita studej Daugovpiļs Universitatis muokslys magistranturys gleznīceibys specialitatē.