Leidz 8. janvaram Rēzeknis Centraluos bibliotekys abonementā apsaverama ceļojūšuo fotoizstuode “Latgolys bibliotekars – rodūšuma olūts”, kas mudynoj bibliotekarā īraudzeit goreigi pīpiļdeitu, rodūšu i īdvasmys boguotu kulturas darbinīku.

Izstuode itūvosor Daugovpilī tyka taiseita projekta “Latgolys regiona publiskūs biblioteku darbinīku konfereņce “Pi gaismys olūta veļdzētīs nuoc…”” ītvorūs. Pyrms tam sevkurs interesents tyka aicynuots īsyuteit kvalitativys kartenis, sovā redzīnī atkluojūt bibliotekarus i jūs profeseju, akcentejot tuos rodūšuma izpausmis.

Īsyuteituos kartenis izstuodei tyka atlaseitys konkursa kuorteibā. Izstuodē apsaverami vairuoku autoru dorbi, kurūs radzamys vysaidu Latgolys nūvodu i piļsātu bibliotekaris i kasdīnys dorbā, i cytuos šaļtīs. Tamā storpā ir ari Rēzeknis biblioteku darbineicys. Kūpumā izstuodē ītvartys 22 kartenis, 4 nu tom radzamys Rēzeknis bibliotekaris.

Daugovpilī izstuode tyka prezentāta 18. septembrī, kod tī nūtyka konfereņce, nu niu tei apceļoj Latgolys bibliotekys – jau ir pabejuse Naujenē, Preiļūs i Ludzā. Janvarī nu Rēzeknis Centraluos bibliotekys izstuode dūsīs tuoļuok iz Rēzeknis nūvoda Lendžu biblioteku.

Karteņa: Anna Romanovska