“Palādas” nūsvietej 15 godu jubileju
Janvara vydā Baļtinovys nūvoda pošdarbeibys kolektivi, amatīrteatri nu Gaigalovys, Tiļžys i Brīžucīma tyka aicynuoti puļcētīs Baļtinovys kulturys nomā, kab pīsadaleitu dramatiskuo kolektiva “Palādas” 15. dzimšonys dīnys pasuokumā.
Pasuokuma organizatori beja pasarypiejuši, kab vokors paītu vīnuotā tematikā – tai kai kolektivs lelu sovys dzeivis daļu pavoda ceļā iz izruodem, tai ari itūreiz – ar sūmom i koferim, kas pylni ar izruožu rekvizitim, – akteri atsaroda ceļā. Pasuokuma vadeituoji Ontans i Anne kūpā ar kolegim sveice sevkuru akteri, kas vīnys voi vairuoku izruožu garumā bejs kolektiva sastuovā. Kolektivs pasasaceja vysim, kas kaidā veidā bejuši saisteiti i paleidziejuši itūs godu garumā. Duovonys padavuši, akteri sēdēs autobusā, kab braucīņa laikā kavātūs atmiņuos par 15 godūs padareitū.
Nacionaluo teatra kolektiva puorstuovs Valdis Lūriņš izsaceja sovu prīcu par izveiduotū sadarbeibu ar baļtinavīšim. Telefoniski apsveikuma vuordus saceja ari Reigys Ontans – Uldis Dumpis – vielejūt Anitai Ločmelei turpynuot rodūšū darbeibu i syutūt sveicīņus puorejam kolektivam. Myusu Ontans – Imants Slišāns – pi seve palyudze Dīveņu, kab Valdis Lūriņš izdūmuotu īstudēt ari izruodi “Latgola.lv-3”.
Piec gostu prīšknasumu, pyrmajom dejom, zalā tyka īnasti svātku torti i, dzīsmem skaņūt, kolektivs nūpyute tymūs īdagtuos sveceitis. Vokora turpynuojumā organizatori beja pasaryupiejuši par vysaidom atrakcejom, kuruos veiksmeiguokī varēja laimēt vysaidys baļvenis.
Teksts: Madara Balode
Foto: Vilhelms Laganovskis
