Nacionaluo elektroniskūs plošsazinis leidzekļu padūme (NEPLP) izsludynuojuse divejus konkursus par raidejumu veiduošonu 2015. godā Latgolys regionalajūs i vītejūs plošsazinis leidzekļūs, kas raida televizejis i radejis programys. Obeju konkursu mierkis ir sabīdreibys sasalīdiešona, nacionaluos identitatis i vaļsts volūdys pozicejis nūstyprynuošonys pasuokumu eistynuošona, kab panuoktu Latvejis identitatis i pīdereibys sajiutys styprynuošonu caur regionaluos i vītejuos identitatis apsazynuošonu i veicynuošonu, itymā procesā īsaistūt Latgolys regiona puorstuovus kai medeju satura veiduotuojus i izplateituojus.

Obejūs konkursūs pretendentim sovi dasacejumi juoīsnādz da 2015. goda 6. februara, nu lāmumu NEPLP pījims da 19. februara.

Saskaņā ar konkursa nūlykumu par TV programu veiduošonu, tuo finansiejums ir 35 571 eiro; taida poša summa pīškierta konkursam par radejis programu veiduošonu (konkurss teik finansāts nu NEPLP pīškiertajim leidzeklim sabīdreibys salīdiešonys, nacionaluos identitatis i vaļsts volūdys pozicejis nūstyprynuošonys pasuokumu eistynuošonai 2015. godā sabīdryskuo pasyutejuma ītvorūs). Sabīdryskais pasyutejums paradzāts regionalajim i vītejim elektroniskajim plošsazinis leidzeklim i producentu grupom Latgolys regionā.

Saskaņā ar konkursu nūlykumu par TV i radejis programu veiduošonu, konkursu prīškmats ir sabīdriski politisku televizejis i radejis raidejumu (latviski/latgaliski) veiduošona Latgolys regionā 2015. godā sabīdreibys salīdiešonys, nacionaluos identitatis i vaļsts volūdys pozicejis nūstyprynuošonys pasuokumu eistynuošonys ītvorūs.

Konkursūs ir aicynuoti pīsadaleit:

– regionaluos i vītejuos televizejis, kai ari regionaluos i vītejuos radejis, kas atsarūn (juridiskais adress) Latgolys plānuošonys regionā, kai ari Latgolys kulturviesturiskajā teritorejā i kas atbylst Elektroniskūs plošsazinis leidzekļu lykuma (EPLL) 71. panta ūtruos dalis nūteikumim attīceibā iz elektroniskajim plošsazinis leidzeklim, kam var tikt nūdūta daļa sabīdryskuo pasyutejuma;

– producenti voi producentu grupys, kas nūslāgušys vīnuošonūs par raidlaiku regionalajuos i vītejuos televizejuos voi regionalajuos i vītejuos radejuos, kas atsarūn (juridiskais adress) Latgolys plānuošonys regionā, kai ari Latgolys kulturviesturiskajā teritorejā i kas atbylst EPLL 71. panta ūtruos dalis nūteikumim attīceibā iz elektroniskajim plošsazinis leidzeklim, kam var tikt nūdūta daļa sabīdryskuo pasyutejuma.

Obeju konkursu nūlykumi atrūnami NEPLP sātys lopā.