Preiļu dzeivuotuoji i tyvuokī sābri vys jau byus pamanejuši muokslys aktivitatis, kas 2014. godā aizasuoce tierdznīceibys centrā “Ūga” i pamozom izaplete plašuok piļsātā i tuos apleicīnē. Ar nūsaukumu Laikmeteiguos muokslys sezona “Preilis” goda laikā tyka eistynuotys izstuodis, atkluotuos muokslys nūdarbeibys, izruode i pleners. Laikmeteiguos sezonys ītvorūs 8. februarī 13.00 T/C “Ūga” nūtiks laikmeteiguos dejis izruode “Dunkani – dīvaiņi vai pravieši?”, kurā projekta “Dejas anatomija” horeografis sadarbeibā ar dejis dramaturgi Intu Balodi īpazeistynuos skateituojus ar modernuos dejis dzimšonu 20. godu symta suokuos i divejom naparostom personeibom – Aisedoru i Raimondu Dunkanim.

Pasuokumu cyklys aizasuoce ar gleznuotuojis i performaņču muokslineicys Andys Luocis personalizstuodi “Sākums” i Zeimiejumu teatra izruodi bārnim “7 pasakas par Ņukucīti”. Daudzu skateituoju syltu atzineibu izapeļneja vosorys plenera izstuode, kurā sovys Preilim veļteituos gleznys, grafikys i instalacejis izstuodeja 8 profesionali Latvejis muokslinīki. Rudinī tyka turpynuots ar gleznīceibys klasikis Aijis Zarenis personalizstuodi “Letiņš”, veļteitu latvyskajai identitatei; sovukuort sezonu nūslēdze keramikis Elīnys Titānis naparostī, tielnīciskī lelformata dorbi. I izstuožu atkluošonys pasuokumūs, i izstuožu nūrisis laikā Preiļu dzeivuotuojim tyka pīduovuots pīsadaleit atkluotuos muokslys nūdarbeibuos. Vairuokuos nūdarbeibuos pīsadaleja ari Preiļu muzykys i muokslys školys školuotuoji i audziekni, kuru dorbi tyka īkļauti “Preiļa” izstuodēs! Taipat augleiga sadarbeiba izaveiduoja ar Preiļu viesturis i lītiškuos muokslys muzeju, kura kruojuma materiali īdvasmuoja i 2014. goda plenera muokslinīkus, i jaunuos sezonys izstuožu autoris.

2015. godā Laikmeteiguos muokslys sezona “Preilis” turpynojās, i programa tiks veiduota, jemūt vārā pyrmuo goda pīredzi. Tyka nūvāruots, ka preiļu dzeivuotuojus vysvaira interesēja tī projekti, kurūs beja vareiba īsasaisteit pošim voi kuri tyka radeiti sadarbeibā ar vītejim dzeivuotuojim. Partū itūgod iz Preilim tiks aicynuoti muokslinīki, kuri roda dorbus, bolstūtīs konkretu vītu izpietē. Tai Eva Vēvere i Laura Prikule, kuru instalaceju “Poētiskais robotisms. Preiļi” beja vareiba redzēt 2014. goda plenera laikā, jau gasteja Preiļūs 3 dīnu rezidencē, kurys laikā ceņtēs īpazeit piec īspiejis dažaidys Preiļu piļsātys i tuos dzeivuotuoju škautnis. Muokslineicys devēs ekskursejuos pa piļsātu, sasatyka ar Preiļu Vaļsts gimnazejis školuotuoju Annu Svili i juos školānim, ar fotografu i kolekcionaru Igoru Pliču, dzejnīkim Andi Surguntu i Eināru Pelšu, vairuokim piļsātys i tyvuokūs mīsteņu dzeivuotuojim, kai ari atkuortuoti gasteja Preiļu viesturis i lītiškuos muokslys muzejā. Rezideņcis laikā savuoktī materiali teik apkūpuoti i kolpuos par pamatu obeju muokslineicu kūpdorbam – jaunai izstuodei, kū paradzāts atklāt Preiļūs majā.

Leidzeigi nūritēs dorbs pi Preilim veļteitys dejis izruodis, kū veiduos laikmeteiguos dejis projekta “Dejas anatomija” horeografis sadarbeibā ar zynomū kūklātuoju Laimu Jansoni. Jau 8. februarī doncuotuojis gastēs Preiļūs ar izruodi “Dunkani – dīvaiņi vai pravieši?” i atkluotū laikmeteiguos dejis nūdarbeibu, kurys laikā cer satikt i īpazeit pyrmūs nuokamuos izruodis varūņus.

Amerikaņu izceļsmis dejis muokslinīki, bruoļs i muosa Raimonds i Aisedora Dunkani 19. i 20. godu symtu mejā aktivai dorbuojuos Rītumeiropā, puorsteidzūt i aizraunūt skateituojus ar Senejuos Grīkejis īdvasmuotu, nu klasiskuo baleta styngrūs formu atbreivuotu deju, tārpim, muokslys dorbim i dzeivis filozofeju. Izruode ir skots iz Aisedorys i Raimonda Dunkanu personeibom, biografeju i davumu muokslys pasaulī. Izruodis veiduotuojis īsaver Dunkanu redzīņūs i aktivitatēs, nasavairūt ari nu privatuos dzeivis detaļu, tai skaitā puorsteidzūši cīšajim sakarim ar Latveju. Doncuotuojis Elīna Breice, Monta Vandere i Agnese Bordjukova izruodē izdoncoj i Dunkanis montuojumu, i sekoj vyspuoreigim juos kusteibys i idejiskajim pryncypim. Dramaturge Inta Bolūde dūd boguoteigu kulturviesturisku kontekstu i aicynoj skateituojus īsasaisteit sarunā. Izruode “Dunkani – dīvaiņi vai pravieši?” bejuse nomināta “Spēlmaņu nakts 2014” bolvai kai “Goda sasnāgums laikmeteigajā dejā”.

Izruodei sekuos atkluota laikmeteiguos dejis nūdarbeiba, kas nūtiks 8. februarī 15.00 Preiļu 1. pamatškolys spīgeļzalā. Sevkurs interesents teik aicynuots paraudzeit laikmeteiguos dejis kusteibys “Dejas anatomijas” doncuotuoju vadeibā. Prīškzynuošonom i sagatavuoteibai nav nūzeimis. Nūdarbeibys laikā i piec tuos īspiejama saruna ar izruodis dalineicom. Īīšona pasuokumūs bez moksys.

Laikmeteiguos muokslys sezonys “Preilis” reikuotuoji Inga Surgunte, Aigars i Ingūna Zīmeļi ir apsavīnuojuši jaundybynuotā bīdreibā ar nūsaukumu “Latgales identitātes telpa”. Bīdreibys mierkis ir īdzeivynuot latgaliskuos identitatis apsazynuošonu ar muokslys paleidzeibu. Bīdreibys ilgtermeņa vīzeja ir atsevišks muzejs, kura ekspozicejā tyktu apkūpuoti “Preiļa” darbeibys laikā radeiti muokslys dorbi, kai ari izveiduota platforma Latgolys identitatei veļteitu kulturys i izgleitojūšu pasuokumu nūrisei. Puorlīceibā, ka muoksla īdvasmoj lobuokai dzeivei, “Preilis” aicynoj sekuot pasuokumu programai “Preiļa” lopā Facebook, kai ari, prūtams, apmeklēt pošys muokslys nūtikšonys i pat pīsadaleit tūs radeišonā!

Roksts sagataveits piec Laikmeteiguos muokslys sezonys “Preilis” kuratoris Ingys Surguntis dūtuos informacejis