LaKuGa jau viesteja par Latgolys Kulturviesturis muzeja akceju “Nūsabiļdej kūpā ar “Ontonu Kūkuoju” Rēzeknē i pīsadoli 75. jubileja fotoprezentacejis veiduošonā!”. 

Vysu janvari tyka sajimti e-posta syutejumi – kartenis viestej aizkustynūšus stuostus, eipaši par laiku, kod Ontons Kūkuojs ir bejs zynoms personeigi, kod kūpā paveikti leli dorbi voi palykuse napabeigta kaida īcarāta dzejis gruomota…

Paļdis sevkuram, kurs uzaticēja i atsyuteja karteņā īmyužynuotū sovys dzeivis šaļti! Muzejā īsagrīze O. Kūkuoja personeibys cīneituoja i lyudze nūskenēt karteņu, partū ka pošai naasūt fotoaparata, nu cīši grybūt atstuot veļtejumu dzejnīkam. Sekojūt Rēzeknis Centraluos bibliotekys kolektiva pīmāram, pīsadaleit aicynuoti ari cyti uzjāmumi, organizacejis, izgleiteibys īstuodis.

Eipaši zeimeigs beja 18. janvars. Taišni itymā datumā – Ontona vuorda dīnā – grupa “Dricānu Dominante” muzejā filmēja sovys jaunuokuos dzīsmis “Cymdu roksti” videoklipu i nūsabiļdēja pi “Ontona Kūkuoja”.

Sevkurs vysa goda laikā aicynuots gastēt Rēzeknē – piļsātu Latgolys sirdī. Garum braucūt voi eimūt juoatrūn Ontona Kūkuoja pīmineklis (Atbreivuošonys alejā 102, laukumā pi Latgolys Kulturviesturis muzeja) i juonūsabiļdej! Laipni lyugti apmeklēt ari muzeju, partū ka Ontona Kūkuoja ražeiguo myuža dzeivis puslopys saistuos ar muzeju – 1980.-1990. g. jis ite struoduoja par muokslinīku. Foto ar komentaru (sovu vuordu, piļsātu, vaļsti i tml.) juoatsyuta iz kukojs75@gmail.com. Fotoprezentaceja byus apsaverama 2015. goda decembrī Latgolys Kulturviesturis muzejā i tuo facebook kontā.

I, prūtams, lai par īdvasmys olūtu tūp jaunuokūs laiku legenda, kura stuosta, ka “Ontona Kūkuoja” rūkā turātajā gruomotā kotrs varūt izlaseit sev pīraksteitū sapynu, kas pīsapyldūt, nu portfeļam juopīsaskar, kab vysi plani izadūtu…

Teksts: Inese Ločmele-Jansone, Latgolys Kulturviesturis muzeja muzejpedagoge

Karteņa: M.Justs (grupa “Dricānu Dominante” 2015. goda 18. janvarī)