14. februarī 15.00 Viļānu nūvoda Dekšuoru pamatškolys zalā (Nuokūtnis īlā 2) nūtiks XIII Ziņgātuoju i stuostnīku vokors i itūgod tuo tema ir “Sasatikšona i patikšona”. Atbylstūši pasauļa meiļuotuoju dīnai kolektivi nu Latvejis i gosti nu Lītovys dzīduos ziņgis par mīlesteibu.

Nu jau 13. godu februara ūtrajā sastdīnē dalinīki nu vysaidu Latvejis vītu sasapuļcēs kūpā “Ziņgātuoju i stuostnīku vokorā”, kab izdzīduotu ziņgis par jaunu puišu i meitu attīceibom, mīlesteibu, īsamīliešonu, sasatikšonu i škieršonūs iz myužu, naruotneibom, tikpat aizrauteigu vacūs ļaužu mīlesteibu, voi ari apdzīduotu vacūs ļaužu runys par mīlys temom.

Ziņgietuoji izpiļdeis nu paaudzis paaudzē montuotys vysmoz 50 godu vacys ziņgis, nu stuostnīki stuosteis nūpītni nanūpītnus gadīņus nu dzeivis, naruotnys i smīkleigys nūtikšonys, anekdotus, īspiejams, ari spletnis, nu kas tū zyna, varbyut tei byus patīseiba.

Kotru godu atsakluoj jauni talanti i stuostnīku vydā – īspiejams, itūgod puorsteigs Alla Kozlovska (Viļāni) voi Anita Rutule (Nagli), voi kaids cyts, i ari ziņgietuoju pulkā, kur daudzys grupys i individualī izpiļdeituoji teik gaideiti kotru godu, nu tikpat syltai publika sagaida ari dalinīkus, kuri pīsadola pyrmūreiz.

Itūgod skateituojus prīcynuos ziņgietuoju kūpa “Skreine” (Nagli), veiru kūpa “Kūzuls” (Dekšuoris), kapela “Sovejī” (Dekšuoris), krīvu dzīšmu vokalais ansamblis “Sudaruški” (Viļāni), folklorys kūpa “Viļōnīši” (Viļāni), folklorys kūpa “Zeiļa” (Ūzulaine, Rēzeknis nūv.), Zviergzdinis lauku kapela (Cyblys nūvods), folklorys kūpa “Izvoltīši”, folklorys kūpa “Isnauda” (Ludzys nūvods), kapela “Sābri” (Saļņova, Kuorsovys nūv.), kapela “Malnavas muzikanti”, Lyzuma lauku kapela, folklorys kūpa “Vecsaule” (Bauskys nūvods), ansamblis “Labākie gadi” (Mārcīna), folklorys kūpys “Rota” dzīdūšī veiri (Rencēni) i cyti.

Vītejim ziņgātuojim pīsavīnuos ari gosti nu Lītovys – kapela “Zarasu mandolinu spielmani” (Zarasi, Lītova) i kapela “Radvija” (Radviliški, Lītova).

Kai īrosts, ziņgātuoji i stuostnīki sajims i skateituoju simpateju i organizatoru puorsteiguma bolvys, i pasuokuma atbaļsteituoju bolvys. Ziņgātuoju i stuostnīku vokoru finansiali atbolsta Vaļsts Kulturkapitala fonds, Viļānu nūvoda dūme, Viļānu kulturys noms, bīdreiba “Lauska”, Tautys muzykantu bīdreiba i tuos sadarbeibys partneri.

Ziņgātuoju i stuostnīku vokora mierkis ir popularizēt myusu dīnu folkloru kai sabīdreibys kulturys sastuovdaļu, veicynuot tautys tradiceju saglobuošonu i puormontuojameibu, kai ari nūdrūšynuot izgleituošonys i pīredzis apmainis procesu storp Latvejis nūvodu i uorvaļstu ziņgātuojim i stuostnīkim. Pyrmū reizi ziņgātuoju vokors nūtyka 2003. godā Modyunis rajona Borkovā.

XIII Ziņgātuoju i stuostnīku vokora “Sasatikšona i patikšona” nūrise
2015. goda 14. februarī Viļānu nūvoda Dekšuorēs:
15:00 – 18:00 Ziņgātuoju i stuostnīku koncerts/ konkurss
18:30 – 19:00 Uzvarātuoju sumynuošona
19:30 Daņči (ļustiešona i mīluošonuos ar leidza pajimtū)

Vaira informacejis par pasuokumu: Iveta Dukaļska, Tautys muzykantu bīdreibys vaļdis prīšksādātuoja, t. 29167594

Karteņa: nu I. Dukaļskys arhiva.