Jau kaidu laiceņu interneta televizejā Chaula TV var nūsavērt sižetus latgaliski. Raidejumu vadeituoja Zaiga Lāce stuosta: “Ideja par satura radeišonu latgaliski beja jau seņ. Vīns nu myusu principu ir “izīt” uorpus Reigys rūbeža i pastuosteit par aktivitatem regionūs, tymā skaitā ari lauzt stereotipus par Latgolu i izceļt juos sovpateibys, ari latgalīšu volūdu. Latgaliskajam saturam paradzāts izstruoduot eipašu grafiskū nūformiejumu. Tyvuokajā laikā kasdīnys videoklipu rotacejā, zam atseviška nūformiejuma, tiks īkļauta muzyka latgaliski.”

Chaula TV dūd vareibu ari pošim muzikim augšupluodēt sovus video televizejis sātyslopā, kū veiksmeigi ir izmontuojušs taidys latgalīšu grupys kai “Dabasu Durovys”, “Kapļi”, “Gandreiž 10nīkā”, “Metrs” i c. “Kapļi” pabejuši ari Chaula TOP sadaļā.

Chaula TV ir škārsteikla socialuo televizeja, kas izveiduota 2012.godā i kurys mierkis ir maineit prīkšstotus par īrostū televizejis formatu. Deļtuo Chaulā dorbojās jaunīši, kuri, izmontojūt televizejis tehnologejis, roda interaktivu, atraktivu saturu, akcentu līkūt iz augstys kvalitatis attālu.

Pīduovuojam nūsavērt Chaula TV latgaliskūs sižetus:

Saruna ar “Green Novice” vokalistu i gitaristu Alvi Bernānu

Saruna ar jaunīšim nu bīdreibys “Latgola 2030”

Saruna ar Vinetu nu LgSC

Saruna ar Guntu Nagli

Viesti sagataveja: LaKuGa