Gazeta “Diena” aicynoj bolsuot par 2014. goda “Dienas” goda bolvys kulturā kandidatim – kvalitativom i puorsteidzūšom nūtikšonom muzykā, literaturā, vizualajā muokslā, kino i teatrī. Literaturys sadaļā ari divejis gruomotys, kas saisteitys ar Latgolu – Ilzis Spergys “Dzeiveiba” i Ingys Ābelis “Klūgu mūks”.

Ilzis Spergys stuostu kruojumā “Dzeiveiba” apkūpuoti deveni da šam napublicāti ci škārsteiklā fragmentari publicāti stuosti myusdīnu latgalīšu rokstu volūdā. Gruomotys redaktore ir Anna Rancāne, gruomotys izdeviejs – SIA “Cymuss”. Gruomota bejuse nomināta ari bolvys “Kilograms kultūras” catūrkšņa bolsuojumam.

Ingys Ābelis romans “Klūgu mūks” ir stuosts par pyrmūs Latgolys latvīšu bazneickungu i liduotuoju dabasu olkom, par cylvāka sirds i sapruota celim, par grāku i pīdūšonu. Golvonuo varūņa prototips ir Fraņcs Trasuns – katuoļu prīsters, teologejis magistrs, īvāruojams vaļstsveirs i sabīdrisks darbinīks, kam 2014. godā byutu palykuši 150 godu. Gruomota ir ari vīna nu bolvys “Kilograms kultūras” goda finalistem.

Nūbolsuot par spylgtuokajom 2014. goda kulturys dzeivis nūtikšonom pīcuos kategorejuos i taidā veidā nūsaceit skaiteituoju favoritus ir īspiejams da 5. marta škārsteikla bolsuojumā portalā diena.lv. Vīns laimeigais bolsuotuojs sajims īlyugumu divejom personom iz apbolvuošonys ceremoneju, kas nūtiks 12. martā.

Nominantus izvierzej žūreja – kulturys žurnaliste i redaktore Undīne Adamaite, kulturys i popkulturys žurnalists, redaktors Jegors Jerohomovičs, muzikologe Inese Lūsiņa, teatra kritiks i žurnalists Atis Rozentāls, literaturys eksperts Aivars Eipurs, vizualuos muokslys kritiks Vilnis Vējš i kino kritike Dita Rietuma.

“Dienas” goda bolva kulturā ir gazetys tradiceja nu 2001. goda. Tei ir vareiba saceit paļdis muokslys personeibom, kas goda laikā vysvysaiduos intonacejuos īdvasmuojušys i ļuovušys justīs tyvuok harmonejai i spākam, nu tikpat lelā mārā “kitynuojušys” i ruodejušys prīškzeimi, kai byut napareizim.