Papyldynojūt myusdīnu latgalīšu literaturys kluostu, bīdreiba „Latgolys Studentu centrs” izdavuse latgalīšu autoris Anitys Mileikys debeja dzejūļu kruojumu „mūžīgā nepārtikusī stirna”. Gruomotys redaktore ir dzejneica i publiciste Anna Rancāne. Dzejis kruojums izdūts ar Vaļsts Kulturkapitala fonda atbolstu.

Anita Mileika roksta gon latvīšu literarajā, gon latgalīšu rokstu volūdā. Ari dzejis kruojumam ir divejis dalis: latvīšu literarajā volūdā i latgalīšu rokstu volūdā raksteitī dzejūli. Tī atkluoj autoris pasauļa dualismu, tok ari obeju pasauļu saikni. Obejom dzejūļu kruojuma daļom izvālātī motivi sasabolsoj i stuosta par sīviškū pasauli, kuram tryukst mīlesteibys.

Mileikys dzejis kruojumā „mūžīgā nepārtikusī stirna” nav īvāruota latgalīšu dzejis tradiceja. Autore atsaļaun izaicynuot sabīdreibu i raksteit uorpus katuoliski korektuos tekstu ramys, izsokūt tekstā sīvītis seksualitati. Deļtuo kruojumā īkļautuo dzeja ir dabuojuse latgalīšu auditorejis viereibu i dažaidu attīksmi — gon nicynūšu, gon atzineigu.

Anita Mileika ir vīna nu tūs jaunūs autoru, kurī regulari pīsadola tekstu skaitejumūs kūpā ar cytim latgalīšu autorim, kai ari publicej dzejūļus latgalīšu ziņu portalā lakuga.lv. Taišni portalā Lakuga.lv publicātī A. Mileikys dzejūli tyka atzeiti par spylgtuokū 2011. goda debeju i dabuoja Latgalīšu kulturys goda bolvu „Boņuks 2011”, kas ir augšuokais apbolvuojums latgalīšu kulturā.

Anita Mileika ir dzymuse 1987. godā Dagdys nūvoda Osyuna pogostā, daboj filologejis magistra gradu Rēzeknis Augstškolā. A. Mileikys dzeja da šam publicāta Latgalīšu kulturys portalā Lakuga.lv (2011, 2012), interneta žurnalā Satori.lv (2012, 2013, 2014), žurnalā „Karogs” (2009) i Literaruos Akademejis kūpkruojumā „Toksiskā rasa” (2008).

A. Mileikys dzejis kruojums „mūžīgā nepārtikusī stirna” byus nūpierkams LgSC gruomotu stendā izstuodis „Latvijas Grāmatu izstāde 2015” laikā nu 27. februāra da 1. martam Starptautiskajā izstuožu centrā Kīpsolā.

Viesti sagataveja: LgSC