Tai ir. Laiks sovu dora pats. Viņ jam vāga munu rūku. Taipoš kai maņ – kotra školuoutuoja, bārna, juo mamys i tētuka, vacmamenis voi vactāva rūku, lai koč kū lobu, ļusteigu i kruosainu sameistaruot. Sameistaruot tū, kas navaida raksteits nivīnā izgleiteibys programā, i navaid satylpynuoms instrukcejuos voi zam lozunga “tai vāga ci pareizi”. Dvēselis syltumu tī naīlikt. Kūpā byušonys prīcu navar īprogramēt. Tys, voi nu ir, voi nav kūpeigajā ašņaritē. Deļtuo lelum lelais paļdis kotram, kas jēme daleibu 2015. goda 13. februārī J. Soikana Ludzys muokslys školys (JSLMS) divejūs pasuocīņūs.

Pyrmais. Tyka nūslāgta fotografa Imanta Urtāna izstuode – veļtejums bierneibys piļsātai Ludzai i aizguojušajam zyrga godam. Sasatikšona beja profesionali i radnīciski īkruosuota. Muokslinīks pastuosteja par sovom gaitom fotografejis pasaulī: darbeibys vierzīnim žurnalistikā, kuozu, dzīduotuoju, akteru, dobys ainovu i socialu reportažu fotografiešonā, gūdolgom konkursūs, izgleteibys īspiejom, dalejuos pīredzē i atbiļdeja iz vaicuojumim. Šys tys nu saceituo, kai spuornuots teicīņs lai dalidoj ari da jiusu, kas nabeja kluotyn: “Ka jums ir breivs laiks i breivi leidzekli, jius varit suokt nūsadorbuot ar fotografiešonu. Tod vaira nabyus ni breiva laika, ni leidzekļu.” Kai taustomu pateiceibu J. Soikana Ludzys muokslys škola paduovynuoja muokslinīkam kalenderi 2015. godam ar Latgolys i Latvejis fotografa – legendys Juoņa Gleizda dorbim i sorkonu amarilli.

Sarunys ar dailinīku  Imantu Urtānu. Sandrys Vuorkalis foto.

Ūtrais, kas ar pyrmū cīšai kūpā saisteits, deļtuo ka īmyužynuoja biļdēs jū fotografs Imants Urtāns, beja pasuocīņs – Breivais mikrofons. Ideja puorjimta nu saimu kusteibys 3×3 i saturiski leidzynojās Biļžu trikmīņam, kod muokslinīki dzīd, bet muzykanti maļavoj. Pagaidom eistynojās viņ pyrmuo daļa. J. Soikana Ludzys muokslys školys bārni, jūs draugi, muosys, bruoli, vacuoki, vacvacuoki var atkluot cytus sovus talantus iz improvizeituos skotuvis ar eistu i butaforisku mikrofonu. Pasuocīņs lieneišom palīk par tradiceju – trešū reizi nūtykdams. Koncerta programys 35 prīkšnasumi beja saisteiti ar daudzim skotuvis muokslys veidim: dzejis deklamiešonu, dzīduošonu vīnam, duetā, trejatā, doncuošonu, klavīru spieliešonu div un četrrūceigi, flautys spieliešonu, cyrka muokslu: žongliešonu i tryku ruodiešonu, napīradynuotuos mūdis demonstriešonu, anekdotu stuosteišonu i paruodeišonu (teijātera spieliešona). Vēļ vīnā kuortā vysim cīšai lels PAĻDIS i da cyta gods breivuo mikrofona.

Breivais mikrofons voi BIĻDIS 2015 JSLMS gaumē. Imanta Urtāna foto.

Teksts: Sandra Vuorkale