Nacionaluos elektroniskūs plošsazinis leidzekļu padūmis (NEPLP) reikuotajā konkursā par raidejumu veiduošonu 2015. godā Latgolys regionalajūs i vītejūs plošsazinis leidzekļūs uzvariejuši SIA “Lietišķā Latgale” i SIA “Dautkom TV”.

Konkursā par radejis programys veiduošonu par uzvarātuoju tyka atzeits producentu grupys “Lietišķā Latgale” pīduovuojums. Tys paradz turpynuot veiduot raidejumu cyklu “Pi myusim Latgolā”, kas kotru nedeļu ēterā dzierdoms nu 2012. goda beigu. “Lietišķā Latgale” pīduovoj veiduot treis raidejumus nedeļā ar kūpejū originalsatura garumu nu 45 da 50 minutu. Raidejumi par kulturys nūtikšonom Latgolys regionā byus dzierdomi caturtdīnēs, pīktdīnēs byus sabīdriski politisks raidejums par Latgolys regiona aktualitatem ar apakšrubrikom, nu sastdīnēs paradzātys intervejis.

Raidejumi byus dzierdomi radejis stacejuos “Latgales radio”, radejā “Ef-Ei” i “Divu krastu radio”. Ituos radejis stacejis sasnādz latvyski, latgaliski i ari krīvyski runojūšu auditoreju. Raidejumi dzierdomi ari škārsteiklā, tymā skaitā ari LaKuGā. Raidejumu veiduotuoji jau itūšaļt sasadorboj i ari itūgod planavoj sasadorbuot ar Latvejis Radeju.

Konkursā par TV programu veiduošonu par uzvarātuoju tyka atzeits SIA “Dautkom TV” pīduovuojums.

SIA “Dautkom TV” pīduovuojums, kas radeits kūpā ar SIA “Latgales reģionālā televīzija” (LRT) paradz veiduot raidejumu cyklu “Spīgeļs”, kū veiduos 10 raidejumi – kotrs 26 minutu garumā. Tys byus radzams reizi mienesī nu ituo gods marta da decembra. Raidejumu cyklam byus divejis dalis – “Patiesā Latgale” i “Vai latgaliešiem nepieciešams latgaliskais. Identitātes meklējumos” – i kotrā pīci raidejumi.

LRT veiduos desmit raidejumu cyklu “Pa sovam”, kas byus dokumentali informativi kotra mieneša raidejumi par Latgolys regionu i ļaudim. Eipaša nūzeime tiks pīvārsta Latgolys etniskajai i kulturalajai daudzveideibai, izceļūt atseviškys tuos izpausmis formys, reizē akcentejūt regiona i tuo dzeivuotuoju saikni ar Latveju.

Raidejumi byus radzami “Dautkom TV” i LRT. Programys veiduotuoji apsajāmuši ryupētīs par raidejuma pīejameibu skateituojim vysā Latvejā. Informaceja par kotru raidejumu tiks publiskuota portalūs “Dautkom.lv” i “Grani.lv”, kai ari drukavuotajūs i socialajūs medejūs.

Kai viesteits, konkursā par TV programu veiduošonu dasacejumus beja īsnāgušys SIA “Dautkom TV” i SIA “Studija 3KM”. Konkursā par radejis programys veiduošonu beja dasasacejs vīns pretendents – SIA “Lietišķā Latgale”.

Konkursu finansiejums par TV programu veiduošonu ir 35 571 eiro. Taida poša summa pīškierta konkursam par radejis programu veiduošonu. Tys teik finansāts nu NEPLP pīškiertajim leidzeklim sabīdreibys salīdiešonys nacionaluos identitatis i vaļsts volūdys pozicejis nūstyprynuošonys pasuokumu eistynuošonai 2015. godā sabīdryskuo pasyutejuma ītvorūs.