Da 25. marta Latgolys viestnīceibā GORS apsaverama fotografeju izstuode “Azari zyli i bazneicys boltys”.

Iveta, Silvija, Juoņs i Valdis – jūs saista divejis kūpeigys lītys – fotografeja i Latgola. Vysi četri fotografej i vysim ir saknis Latgolā. Partū tyka radeita izstuode ar koncepceju – latgalīši par Latgolu. Iveta i Juoņs ruoda skateituojim Latgolys dobu, Silvija – akcejis “Vīna dīna Susuoju pogostā” rezultatu, Valdis – latgalīšus i vidi ap jim.

Ivetys Tumaševičys tāva dzymtuo sāta ir Preiļu rajonā, itūšaļt Rībeņu nūvodā. Tī jei sateikama kotru vosoru, partū ka īmīļuojuse itū sātu i skaistū dobu. Vuicejusēs Reigā. Školā i vāluok aktivai nūsadorbuojuse ar zeimiešonu, atsateistūt digitalajam foto, prīškrūka teik dūta fotoaparatam. Fotografeja ir izpausmis veids, kurā kotrs nu mums cenšās saredzēt i paruodeit cytim koč kū eipašu, sajimt pozitivys emocejis i dūt tuos skateituojam. Itūreiz izstuodē pīsadola ar Latgolys dobys ainovom. Pateik fotografēt klusuos dobys, kur var īlikt fantazeju i izapaust, kai ari cylvākus, eipaši lauku ļauds.

Juoņs Stars vydsškolys laikā, ostoņdasmytajūs godūs, beja izmontuojs vareibu dorbuotīs fotopuļceņā Jākubpilī, kura vadeituojs beja tūlaik zynomais fotografs Aivars Āķis. Byudams students, kuldys naudu peļnejs, fotografādams bēris i kuozys, nu tuos piec kaida laika tik cīši apnykušys, ka piec tam godim ilgi nav gribiejīs kameru pi acs likt. Niu prīcojās, ka kaida karteņa ruodīs interesanta na tik pošam, nu ari draugim. Da šam nikod nav pīsadalejs izstuodēs i nikod nav sajiems nikaidys atzineibys.

Silvijis Danelsonis pyrmuos kartenis tyka radeitys pyrmajā školys dīnā – pyrmajā klasē 1. septembrī.  Školys laikā pa dīnu safotografietuos fiļmenis sātā tyka dreiži atteisteitys, kab tuos izkolst, cikom tyka apmaklāta muzykys škola i gataveitys stuņdis. Vāluok tymsā topa biļdis, kab nuokamajā dīnā tuos var nest iz školu. Piec tam kaidu laiku fotoaparats tyka nūlykts maleņā, partū ka beja rodušuos cytys nūdarbis i hobiji. Fotografeja vaira nakai hobijs īinteresēja 90. godūs, kod najauši eimūt garum, tyka īraudzeits, ka fotoklubs “Rīga” organizej kursus pi fotografu – Zigurda Bilzoņa i Gunāra Bindis. Zīmā, kod uorā ir palāks i tymss, teik radeitys klusuos dobys i dyumu kartenis, vosorā – dobysskoti, daudzajūs ceļuojumūs – ceļuojumu kartenis. Ir fotokluba “Rīga” bīdre. Bejušys personalizstuodis Tukumā, Varšavā, Reigā, Ludzā i Līpuojā. Pīsadalejuse vairuokuos grupu izstuodēs. Pīsadola FIAP patronažys salonu konkursūs i sajāmuse apbolvuojumus.

Vladislavs Kundzeņš pyrmū reizi ar fotografejis nūslāpumim īsapazyna fotopuļceņā, vuicūtīs 5. klasē. Dzymušuo interese foto ir sasaglobuojuse da šudiņdīnys. Pyrmais fotoaparats beja “Smena – 2”. Studeju laikā tyka nūpierkts “Zenit E” i sekmeigai tyka dokumentātys vuiceibys, praksis, balleitis, sadzeive i cyti pasuokumi. Pasaruodūt digitalajom fotokamerom, interese par foto pasastyprynuoja. Fotografieta puorsvorā doba: ainovys, putyni, dzeivinīki, kukaini, pučis. Pyrmais leluokais panuokums beja 1976. godā, kod fotokonkursā “Studenti celtnieku vienībās” vīna nu īsnīgtajom karteņom sajēme gūdolgu i tyka publicāta laikrokstā “Padomju Jaunatne”. Pādejūs godūs sekmeigi pīsadalejs Latvejis Dobys muzeja reikuotajūs godskuortejūs fotokonkursūs “Mans putns”. Grupys “Lieliskie fotodraugi” sastuovā vairuokus godus aktivai pīsadola vysaiduos fotoizstuodēs.