Vysa 2015. goda garumā sevkurs interesents aicynuots giut fotošaļtenis, kas raksturoj Leivuonu vysūs godalaikūs, i pīsadaleit fotokonkursā “Līvāni – manu sajūtu pilsēta”.

Konkursu organizej Leivuona nūvoda pošvaļdeiba, tuo mierkis ir apkūpuot lobuokuos autoru fotografejis, kū izmontuot Leivuona piļsātys marketinga vajadzeibom. Konkursa zīmys/pavasara kuorta nūtiks nu marta da maja, vosorys kuorta – nu juņa da augusta, rudiņa kuorta – nu septembra da oktobra.

Konkursā var pīsadaleit sevkurs foto amatīrs voi profesionaļs, Leivuona nūvoda sātyslopā aizpyldūt elektroniskū dasacejuma anketu i īluodejūt kartenis (vīnā kuortā var īsnīgt na vaira kai 10 fotografejis).

Karteņom juoatspīgeļoj Leivuona skaistuokuos, interesantuokuos vītys i juoraksturoj sajiutys, kurys ir eipašys taišni Leivuonam. Karteņom nav juobyut tik piļsātys ainovom, tuos var atspīgeļuot kaidu Leivuonam rakstureigu nūskaņu, sajiutu, smuordu voi garšu, kai ari dzeivuotuoju i piļsātys gostu emocejis kasdīnys dzeivē, dorbā, svātkūs, vysaidūs godalaikos.

Vysys fotografejis kotrys kuortys beiguos viertēs konkursa žūreja, izavielejūt kotrys kuortys 20 lobuokuos fotografejis, kurys tiks izmontuotys Leivuona piļsātys tuoluokajom marketinga vajadzeibom i Leivuona 90 godu jubileja kalendera 2016. godam veiduošonai. Kotrā kuortā tiks nūsaceita ari vyslobuokuo fotografeja, kurys autors sajims 50 eiro naudys bolvu.

Karteņa: LaKuGys argivs