Nacionaluo elektroniskūs plošsazinis leidzekļu padūme (NEPLP) apstyprynuojuse Latgolys elektroniskūs plošsazinis leidzekļu atteisteibys programu. Tuos viersmierkis ir styprynuot Latgolys informativū sasaisti ar puorejim Latvejis regionim i garantēt, ka pīrūbežā dzeivojūšī Latvejis dzeivuotuoji teik informāti par vaļstī nūteikūšajim procesim i storptautiskūs nūtikšonu atteisteibu.

Programmys izvierzeitī mierki ir: sabīdreibys salīdiešona, nacionaluos ideņtitatis i vaļsts volūdys pozicejis nūstyprynuošona, kai ari vaļstiskuos pīdereibys sajiutys styprynuošona Latgolys regionā puorstuovātūs mozuokumtauteibu puorstuovu vydā; sabīdreibys informiešona par vaļstī i Latgolys regionā nūteikūšajom socialajom, ekonomiskajom i kulturys aktualitatem, kai ari sabīdryskūs medeju kluotbyutnis styprynuošona Latgolys regionā; nūdrūšynuot Vaļsts volūdys lykumā i Elektroniskūs plošsazinis leidzekļu lykumā nūsaceitū latgalīšu rokstu volūdys, kai viesturiska latvīšu volūdys paveida saglobuošonu, aizsardzeibu, atteisteibu i lītuošonu; veicynojūt regionaluos ideņtitatis apsazynuošonu, panuokt Latvejis ideņtitatis i pīdereibys sajiutys nūsastyprynuošu i mozynuot sābru vaļstu informacejis īspaidu iz regiona dzeivuotuoju sabīdryskuos dūmys veiduošonu; veicynuot regiona dzeivuotuoju pīdereibu Latvejai i Eiropai.

NEPLP ir ari vairuoki īsacejumi pasuokumim medeju telpys styprynuošonai Latgolā, kab ar samāruojamu īguļdejumu sasnāgtu vysleluokū auditoreju:

• Turpynuot finansiejumu, kuru NEPLP konkursa kuortā pīškir raidejumu veiduošonai Latgolys regionalajūs i vītiejūs elektroniskajūs plošsazinis leidzekļūs (EPL), kas raida TV i radejis programys latgalīšu volūdā.

• Finansiejuma pīškieršona komercialajim EPL, kas veidoj radejis programys Latgolā krīvyski runojūšajai auditorejai.

• Finansiejuma pīškieršona komercialajim EPL i producentu grupom, kas veidoj televizejis programys Latgolā.

• Finansiejuma pīškieršona sabīdriskūs medeju (Latvejis Radejis) studejis izveidei Latgolā.

Programā ītvartys ari investicejis sabīdryskuo medeja satura ražuošonai, kas paradz padzilinuotu Latgolys tematikys integraceju Latvejis Radejā i Latvejis TV, nūsokūt tam konkretu sabīdryskuo pasyutejuma daļu, kai ari aktivitatis audiovizualuo satura nalykumeigys izplateišonys īrūbežuošonai Latgolā, pasuokumus NEPLP kapacitatis styprynuošonai i iniciativys komunikacejis zynuotnis apgivei Latgolā (par pīmāru, jaunys studeju programys komunikacejis zynuotnē izveide Rēzeknis Augstškolā).