18. aprelī Rēzeknē ar Andryva Jūrdža saceitajim vuordim “Nazadzenīs augstuoks par cytim byut, bet dzenīs lobu darēt i gudruoks kliut” kai moto jau 15. reizi nūtyka skotuvis runys konkurss “Vuolyudzāni” i latgalīšu rokstu volūdys i kulturviesturis olimpiade.

Itūgod pec dalinīku, školu lyuguma tyka maineits pasuokuma datums, kab vysi varātu pīsadaleit Lelajā tolkā 25. aprelī. Iz prīšku kotru godu nūtikšona byus trešajā apreļa sastdīnē. Skotuvis runys konkursā pīsadaleja 85 dalinīki nu 11 Latgolys nūvodu, Kruoslovys, Rēzeknis i Ludzys piļsātom, kūpā nu 26 školu. Itī godi, kai Latgalīšu volūdys, literaturys i kulturviesturis školuotuoju asociaceja (LVLKŠA) organizej pasuokumu, līcynoj i par dalinīku pīplyudumu, i ir ari bejuši godi, kod ir tik 60 vuolyudzānu i treis komandys olimpiadē. Divpadsmit godu paguoja, lai olimpiadi atzeitu kai vaļsts atkluotū olimpiadi. Radzama i školu attīksme pret itū latgaliskū nūtykumu, kam nav leidzeiga ni igaunim, kur ceņšās saglobuot viru volūdu, ni pi lītaunīku ar žemaišu volūdu. Paļdis tom školom, kur jiutama školys vadeibys lobvieleiba i iņterese, kur atbolsta sovus školuotuojus, kas zīdoj  uorpusstuņžu  laiku  sovim audzieknim, kab saglobuotu i izkūptu latgalīšu volūdu.

Školāni bez jau taidu pīrostu autoru kai Fraņcs Trasuns, Ontons Slišāns, Ontons Kūkuojs, Anna Rancāne, Koru Kaiva, Neikšanīts i cyti, skaiteja Laurys Stepenis, Ilzis Spergys, Laurys Meļnis, Valentina Lukaševiča, Leonarda Rakicka, Ontūneja Rīkstāna, Māreitis Slišānis, Rasmys Urtānis,  Inetys Urtānis i cytu da šam rešuok izmontuotu autoru  dorbus. Navajadzātu puorlikt dorbus latgaliski nu latvīšu literaruos volūdys, ir pīteikūši izvielis nu latgaliski rokstūšūs autoru.

Poši školuotuoji atzyna , ka: “itys jaukais pasuokums cīši īdvasmuoja. Beja prīca i lapnums byut kūpā ar Latgolys gaišuokajim pruotim – Lideju Leikumu, Annu Rancāni, Juri Viļumu, Gunti Rasimu i cytim, beja lels gondariejums klauseitīs bārnus – kotrs ar sovys dzymtuos vītys izrunu bārni beja kai daudzkruosains, boguots i smaržeigs puču bukets. Cik gon mes, latgalīši, asam boguoti. Kab kotrs tū spātu apsazynuot i izbaudeit, i lepuotīs ar tū. Eipaši patyka tys, ka pateiceibys i duovonys sajēma vysi bārni” (Silvija Ločmele, Bolvu nūvoda Brīžucīma p-škola);

“Pasuokums mums cīši pateik, partū jau cik godus braucam. Kūpumā pateik tei nūskaņa, kas volda. Lela nūzeime žūrejis lobvieleigai attīksmei, poši pozitivi, izceļ lobū, tys bārnim ir svareigi.” (Ināra Grahoļska, Cyblys nūvoda Cyblys v-škola);

“Muns redzīņs par “Vuolyudzānim”: pasuokums kotru godu nūteik pateikamā, draudzeigā, sirsneigā gaisūtnē, prīca par tū i paļdis Rēzeknis 1. vydsškolys aurai! Kotru godu prīcojūs satikt zynomus ļauds, kū radzu reši, dažus tik itamā apreļa sastdīnē. Paļdis par pyulem i pošaizlīdzeibu, reikojūt svieteigū konkursu! ”( Ērika Bozoviča, Rēzeknis nūvoda  Gaigalovys p-škola),

“Vysleluokuo pateiceiba par breineigū pasuokumu! Var sajust, ka latgalīšu volūda vēļ dzeivoi. Prīca beja redzēt Latgolai nūzeimeigus cylvākus, kuri atroda laiku itam pasuocīņam. Interesanti prīšknasumi, gaismā caltys pērleitis. Bārnim cīši patyka. Lai ilgs myužs itam konkursam i juo dvēselei Veronikai Dundurei!” (Rasma Zuša, Ruguoju nūvoda, Eglainis p-škola).

Paļdis školuotuojim par atsyuteitajim īteikumim, kū jimsim varā nuokušajā godā (par pīpiļdeitom rezultatu gaideišonys pauzem, bez kurom navar iztikt, ka grybom apbolvuojumus sajimt tamā pošā dīnā; par Atzineibom i Pateiceibom).

Vuolyudzānu rezultati:
1.- 4. kl.
1. vīta: Juoņs Piveks – Veremu p-škola, šk. Ināra Ratnīce
Maksims Pavlovs – Nierzys p-škola.

2. vīta: Oskars Zimarskis – Rēzeknis 5. v-škola, šk. Rūta Dortāne
Andžejs Rasims – Veremu p-škola, šk. Ināra Ratnīce
Sonora Logina – Baļtinovys v-škola, šk. Irēna Kaša
Aivis Lipskis – Drycānu v-škola, školuotuoja Inguna Butkāne

3. vīta: Raivo Svylāns – Gaigalovys p-škola, šk. Erika Bozoviča
Rūta Vonoga – Nautrānu v-škola, šk. Māreite Zubko
Anneja Leikuma – Škeltovys p-škola, šk. Sarmīte Peipeņa
Ringolds Leontjevs – Rēzeknis Katuoļu v-škola, šk.Valda Igaune
Diāna Antonova – Rēzeknis Katuoļu v-škola, šk. Valda Igaune

5. – 8. kl.
1. vīta: Šarlote Lorija Nagle – Kuorsovys v-škola, šk. Ilona Cybuļska
Agnese Ikstena – Eglainis p-škola, šk. Rasma Zuša

2. vīta: Solvita Ragauša – Prīkuļu p-škola, šk. Diāna Bravacka
Daiga Abramāne – Cyblys v-škola, šk. Ināra Kuznecova
Imants Spīčs – Gaigalovys p-škola, šk. Erika Bozoviča

3. vīta: Izabella Stelikova – Cyblys v-škola, šk. Ināra Kuznecova
Marta Mičule – Dravnīku p-škola, šk. Valentina Mičule

9. – 12. kl.
1. vīta: Amanda Anusāne – Dravnīku p-škola, šk. Valentina Mičule
Dairis Smirnovs – Cyblys v-škola, šk. Ināra Kuzņecova
Īva Jokste – Kruoslovys Vaļsts gimnazeja, šk. Daina Andžāne

2. vīta: Juoņs Keidāns – Drycānu v-škola, šk. Gunta Kazuševa
Kristiāna Zizlāne – Eglainis p-škola, šk. Rasma Zuša
Juoņs Umbraško – Aulejis p-škola, šk. Lolita Dzalbe

Olimpiadē vydsškolānim pīsadaleja 3 školu komandys (Baļtinovys v-škola, Tiļžys v-škola, Kruoslovys Vaļsts gimnazeja) i Rēzeknis Augstškolys 2 komandys. Olimpiade nūtyka pīcuos kuortuos. 1. kuortā dalinīki paruodeja latgalīšu volūdys prasmis i atbiļdēja iz vaicuojumim par volūdys viesturi; 2. kuorta beja veļteita Andryva Jūrdža 170. jubilejam, 3. kuorta – Nikodemam Rancanam; 4. kuorta – Ontona Kūkuojam; 5. kuortā – tradicionalais kulturys tests. Kūpā varēja sajimt 100 punktus.
1. vīta: Kruoslovys Vaļsts gimnazejai (53 p.) (Diāna Jakovele, Īva Jokste, Armands Juoņs Stepeņš, Ilona Stepeņa, Laura Japeņa) , šk. Inga Skerškāne
2. vīta: Baļtinovys v-školai (46 p.) (Elvis Bartkevičs, Andris Mežals, Valters Doru, Edgars Jermacāns), šk. Imants Slišāns
3. vīta: Tiļžys v-škola (42 p.) (Sandeja Aleksandrova, Marita Elste, Aira Zelča), šk. Aina Raksteņa
1. vīta: RA 1. komandai (79 p.), (Inese Bukša, Velga Rīksta, Ligeja Purinaša)
2. vīta: RA 2. komandai (50 p.) (Edgars Bistrovs, Santa Perkone, Violeta Jašina)

Z/s “Juri” īpašnīki Lideja i Jurs Lubuoni ar jūs pošu atrostim paleigim deļ ituo dorba īveikšonys i Rībeņu nūvoda Rušyunys pogosta finansialū atbolstu ir izveiduojuši Latgolys kulturvidis karti “Ar Latgolu sirdī”. Taidu breineigu duovonu jī padeve olimpiadis laureatim – Kruoslovys vaļsts gimnazejis komandai.
LVLKŠA soka paļdis skotuvis runys konkursa “Vuolyudzāni” i olimpiadis dalinīkim, školuotuojim, izgleiteibys īstuožu vadeituojim i atbaļsteituojim!

Eipaša pateiceiba:
Rēzeknis nūvoda pošvaļdeibai par olimpiadis finansialu atbolstu,
Rēzeknis 1. v-školai i direktoram (J. Poplavskim, A. Prīdānei);
Rēzeknis Kulturys centra izdevnīceibai (Juoņam Elksnim) par gruomotu duovynuojumu jau pīcpadsmit godu garumā;
Marutai Latkovskai, “Boņuka 2014” bolvys sajiemiejai nominacejā par myuža īguļdejumu latgalīšu kulturā;
Dr. philol., profesorei Lidejai Leikumai (LU), Dr. philol. Ilgai Šuplinskai i Mg philol. Sandrai Ūdrei (RA) par olimpiadis aizdavumu sagataveišonu i viertiešonu; Dzejneicai Anna Rancānei, Rēzeknis Tautys teātra režisorei Mārai Zaļaiskalns, Saeimys deputatam Juram Viļumam, juo paleigam i grupys “Bez PVN” dalinīkam Guntim Rasimam, dzejneicom Līvijai Līpdruvītei i Inetai Urtānei.

Itūgod rudinī aicynuosim vuolyudzānus i olimpiadis dalinīkus ar školuotuojim iz kūpā saīšonys pasuocīni (večerinku) Rogovkā, Nautrānu v-školā. Taipat kai školys reikoj absolventu salidojumus, tys ar byus saliduojums, kab kūpā saliduotu pīcpadsmit godu dalinīki. Daudzi izauga ar Vuolyudzānim, daudzi piec tam īsuoce i turpynuoja dorbuotīs latgalīšu volūdys kūpšonys i saglobuošonys laucenī.

Roksta autore: Veronika Dundure ( LVLKŠA)