29. i 30. majā trešū godu piec kuortys Rēzeknē nūtiks Storptautiskais Muokslys i muzykys festivals “Seven Hills”, aicynojūt izbaudeit laikmeteiguos muokslys izstuodis, prīcuotīs par jaunim sīnu gleznuojumim Rēzeknē, pīsadaleit muokslys i muzykys performaņcēs, izavielēt sovu simpateju Dzeivūs skulpturu vydā i ļautīs dažaidu stilu muzykys valdzynuojumam.

Nu jau tei ir tradiceja – kotru godu “Seven Hills” ītvorūs Rēzeknē kaida kuorma sīna pīdzeivoj puorvierteibys – itūgod Latvejis Muokslys akademejis Latgolys filialis studentis Grīta Butjankova i Anastaseja Bykova, kai ari Rēzeknis Muokslys i dizaina vydsškolys audzieknis Viktoreja Zaiceva i Paraskeva Deikina apgleznuos diveju kuormu suonu  fasadis – Atbreivuošonys alejā 67 (vēļ vīna Rēzeknis baptistu lyugšonu noma sīna) i Atbreivuošonys alejā 86a (“RDK service” sīna pi restorana “Marijas kafija”).

Taipat ari skateituoji varēs piļsātā vāruot muokslinīku dorbuošonūs, partū ka nu 25. da 31. maja nūtiks IX Storptautiskais muokslinīku pleners “Domas lidojums”, kas itūgod veļteits Rēzeknis 730. jubilejam, i plenera dorbus varēs apsavērt izstuodē 30. majā nu 17.00 da 21.00 guojieju promenadē (skverā pi Muzykys veikala, Atbreivuošonys alejā 71).

Festivala ītvorūs byus vareiba īpazeit divejis laikmeteiguos muokslys izstuodis – Līnis Mackus i Artura Arņa izstuodi “Ziemas miegs”, kura byus eksponāta salona “Lāde” telpuos (Krosta īlā 31) i byus apsaverama ari piec festivala da 12. juņa, nu Juoņa Filipoviča izstuodis “Пчеловек/Pčelovek” sovpateigī bišu strūpi īsakļaus dobys vidē pi Rēzeknis piļskolna.

Piļskolnā i tuo tyvumā obejis festivala dīnys varēs redzēt, kai ari īsasaisteit vysaiduos performaņcēs, kuruos sovys muokslys puordūmys demonstrēs muzykys autoru grupa “Dream cathers”, veidojūt puorsteidzūšu “Magiskū pili”, Rēzeknis Augstškolys studeju vierzīņa “Muokslys” studenti dabiskajā ainovā radeis zemis muokslys dorbus, izmontojūt dobys materialus, nu Maija Puncule, kura paguojušajā godā veiduoja vidis objektu “Dziesma” guojieju promenadē, itūgod tū papyldynuos ar idejiski vīnuojūšu instalaceju pi piļskolna.

Ilmārs Uobuleņš puorsteigs skateituojus ar uguņojūšo “Velosipedu”, nu Kate Seržāne uzrunuos skateituojus par sociali aktualu temu, veidojūt “Guojieju puorbrauktuvi” vītā, kur guojieju puorejis nav, nu kasdīnā cylvāki tik i tai škārsoj brauktuvi. Riharda Šešo instalaceja “Kaleidoskops” ļaus īsavērt reizē 5 spīgeļprizmys grafiskajuos škautnēs, kur kaleidoskopa īškpusē ar horeografejis paleidzeibu veiduosīs vysaidi vizuali skaisti roksti, ļaunūt izbaudeit vīnreizeigu kaleidoskopa iluzeju ar deju.

30. majā nu 18.00 da 21.00 guojieju promenadē gar Rēzeknis upi otkon veiduosīs Dzeivūs skulpturu duorzs, kur pīsadaleis i eipaši aicynuotuos Dzeivuos skulpturys nu Latvejis, Nīderlandis, Portugalis, Spānejis, Krīvejis, i Dzeivūs skulpturu konkursa dalinīki. Pasuokuma laikā apmaklātuoji tiks aicynuoti nūbolsuot par sovu skaistuokū, interesantuokū voi puorsteidzūšuokū skulpturu i beiguos vīna nu tom dabuos skateituoju simpateju bolvu. Konkursam dasaceituos Dzeivuos skulpturys viertēs žūreja, jemūt vārā tāla kūpiejū viestejumu, dalinīka meistareibu, estetiskūs i izklaidiejūšūs aspektus, i viertiejuma rezultatā pīcys skulpturys sajims naudys bolvys. Paguojušajā godā konkursā 1. vītu sajēme riezeknīts Aleksandrs Rezvovs, kurs attāluoja baronu Minhauzenu.

Festivalu “Seven Hills” vadeis dīdžejs Tuoms Grēviņš i divejis dīnys varēs baudeit ari breineigu muzyku vysvysaidom gaumem – 29. majā Festivala parkā uzastuos Latgolys muziki: “Dabasu durovys”, Sovvaļnīks, “Šiški i tabačok” i “Aftoportret”, nu 30. majā Rēzeknē koncertēs vairuoki gosti:  “Triānas Parks”, MNTHA, “Sus Dungo”, Ivo Grīsneņš-Greislis (Reiga), “Garbanotas  Bosistas” (Lītova), “Indocile” (Beļgeja) i beidzamajā laikā pats skandalozuokais projekts Latgolā – grupa “Kapļi” (Drycāni/Buozova).

Īīšona vysūs festivala pasuokumūs byus bez moksys.