9. i 10. majā Vileks nūvoda Škilbanu pogosta Balkanūs radūšā i darbeigā atmosferā deveņas Škilbanu etnografiskuo ansambļa sīvas īraksteja vaira kai 20 dzīsmes, kas tiks izdūtas audio diskā izdavumā “Škilbanu sīvas”.

Etnografiskuo ansambļa dzīduotuojas albuma īrokstam ceņteigi gatavejās jau vairuokus mienešus, atlosūt repertuaru i regulari dzīdūt mieginuojumūs. Nasaverūt iz ryupeigajim sasagataviešonas dorbim, vys tik mikroponi i pyrmuo itaida īroksta reize nu suoka lyka sīvom sasatraukt. Piec pyrmūs dzīšmu īroksta pasalyka, ka leluokuo daļa dzīšmu īraksteišonys paliks iz ūtrū dīnu, ka giunās vuordi, matās golūtnis i vēļ saīt kaidas bādas, bet gols golā – pi mikroponu i skaņu režisora Edgara Skrāģa tyka pīrosts, satraukums pīvarāts i dzīsmes īdzīduotas. Tod jau īroksta ūtrajā dīnā leluoka viereiba īroksta procesā tyka pīvārsta sīvu solo dzīduojumim, stuostim i individualajim raksturim. Smīkli i prīceigs pruots nasaryma vysu īroksta laiku, bet piec dorba pabeigšonys jo eipaši palyka labi padareita dorba sajiuta.

Albuma īroksts tyka taiseits projekta “Izdevums “Škilbanu sīvas”” ītvorūs. Projekta eistynuošonu atbolsta Vaļsts Kulturkapitala fonds, tū eistynoj bīdreiba “Latgolys Producentu Grupa”. Audio diska īraksteišona ir tik viņa daļa nu vysu izdavuma sagatavuošonas dorbu: īcarāts, ka disks byus kai dalykums drukavuotai gruomoteņai par Škilbanu etnografiskū ansambli – ansambļa viesturi, dzīduotuojom, repertuaru kai ari vyspuoreigu Zīmeļlatgolas tradicionaluos dzīduošonas montuojuma i eipatneibu īskiciejumu. Paradzāts, ka gotovs izdavums tiks prezentēts, svietejūt Škilbanu etnografiskuo ansambļa 35 godu jubileju 2016. goda vāluo rudiņa pusē.

Škilbanu etnografiskais ansamblis projekta pyrmuos daļas eistynuošonā lelu paļdis par podturiešonu i sadarbeibu soka Vaļsts Kulturkapitala fondam, Vileks nūvoda dūmei, “Balkanu kolnim” (eipaši Vijai Kuļšai), skaņu režisoram Edgaram Skrāgim, kai ari Rutai Cibulei par leidza jusšonu.

[Show slideshow]