Rogovkys sporta hallē – kulturys nomā 30. majā 20:00 stuņdēs nūtiks jau tradicionalais tautys muzykantu festivals – večerinka “O, bļaka!”, kurā jims daleibu Rogovkys i tuoluokys apleicīnis tautys muzykanti i kapelys.

Itam pasuokumam ir sova viesture. Piec Smotra tierga Rogovkā vosorys laikā Rudukūs, dzejnīka Ontona Kūkuoja sātā sabrauce gosti, nu kurim izaruodeja, ka divi ir azartiski muzykanti – Juoņs Žogots iz akordeona i Ontons Savickis iz garmanis. Jim spielejūt duetā, puorejī pīsavīnuojēs, dzīdūt i sytūt ritmu ar vysdažaiduokajim  “instrumentim” —  lizeikom, dakšu butelī, kastruļu vuokim… Lai ritmiskuo grupa byutu nūpītnuoka, tyka pīduovuots izmontuot ari bļaku, pa kuru uzsytūt ar pagali i īvibrejūt, izīt breineiga skaņa! Muziceišona ilga vairuokys stuņdis i sanuoce tik skaļa, ka dzierdēje pat iz Rogovkys krystceļu! A sābru gūvs pat nūzaruove nu važu.

Taida muziciešona pošim īsapatyka, i kotru godu Rudukūs tyka reikuots taids muziciešonys pasuokums, kam Ontons Kūkuojs deve nūsaukumu “O, bļaka!”. I sābru gūvs ituo pasuokuma laikā vysod nūzaruove nu važu, lai ari tyka sītys maksimali tuoli iz ūtru pusi nu Ruduku.

Jau piec Ontona Kūkuoja aizīšonys muyžeibā, ar Nellijis Viļumys iniciativu i pogosta porvaļdis atbolstu itaids pasuokums tyka jau divejis reizis reikuots Nautrānūs, uzaicynojūt tymā muzicēt tautys muzykantus, kas nūts mož i napazeist, nu večerinku gon var nūspēlēt.