Tievanānu pavasars 2015
![Tievanānu pavasars 2015](https://www.lakuga.lv/wp-content/uploads/2015/06/Tievanani-2015-1000x667-c-default.jpg)
Ari itūgod bīdreiba “Latgolys Studentu centrs” aicynoj iz naformalū, nagudrū i nanormali glaunū pasuokumu sevejim i sovejūs sovejim “Tievanānu pavasari” aba “Tievanānu čulanu”. Pasuokumā sasatiks latgalīšu literaturys autori i skaiteituoji, muzykys radeituoji i meiļuotuoji.
Tolka, guojīņs da Valna akmiņa i kūpā byušona itūgod 13. i 14. junī, kai jau īrosts, Tievanānūs (Jaunviļānūs).
Itūgod „Tievanānu čulans” paīs Raiņa zeimē. Kaids nūstuosts viestej, ka taišni Tievanānūs Raiņs saraksteja sovu pyrmū dzejūli latgaliski.*
Tolkys suokums 12:00. Naformali nagudruos i glaunuos vokora dalis suokums 18:00, nu var pīsavīnuot vysa vokora gaitā.
Brauciejim iz tolku leidza juojam dorba cimdi i dorba drēbis. Par pušdīnem byus padūmuots.
Iz vokora daļu juojam leidza lāpa guojīņam da Valna akmiņa, iedīni i dzierīni sovai vādarprīcai.
Palikšona pa nakti piunē ci sovā teltī, deļtuo leidza juojam ari sovs guļammaiss.
*Tai viestej sābru Brone, kurai tū pastuosteja vadaklys mozmeitys meitys krysttāva bruoļa dāla sīva. Nu tei var nabyut ari taisneiba.
Vaira dazynuošonys par pasuokumu pi Vinetys (vineta@lgsc.lv, T. 26149207)
Īīšona pasuokumā bez moksys.
Pasuokumu atbolsta Vaļsts Kulturkapitala fonds projekta “Atbalsts biedrībai “Latgolys Studentu centrs” latgaliešu kultūras popularizēšanai 2015. gadā” ītvorūs.
Viesti sagataveja: LgSC Reigys birojs