Nu 2014. goda decembra sevkuram folklorys i tradicionaluos kulturys pietnīkam voi interesentam daīmams Latvīšu folklorys kruotivis digitalais arhivs garamantas.lv. Tei ir platforma ar mierki pīduovuot vareibu lītuotuojam īsapazeit ar LFK fondūs globuotajom folklorys materialu kolekcejom nu vysys Latvejis.

Arhivs garamantas.lv ir bezmoksys vītne, kurā poši lītuotuoji ari var pīsadaleit satura pylnveiduošonā – materialu šifriešonā. Svareiga ir ari sabīdreibys leidzdaleiba personu datu papyldynuošonā – teicieju i pīraksteituoju atpazeišona, preciziešona; fotografejuos radzamūs personu i vītu nūskaidruošona. Arhivs regulari teik papyldynuots ar jaunom kolekcejom. 

Izstruoduotuo metadatu sistema, materialu sistematiziešona i teksta atlasis reiki nūdrūšynoj, ka arhivs ir ļūti ārti izmontojams pietnīceibai. Sev interesejūšū materialu var meklēt piec vairuokim atlasis veidim – pogosta, žanra, volūdys, tauteibys, organizacejis i tt. Atseviški izdaleitys ari kolekcejuos asūšuos biļdis i iļustracejis, taipat digitalais arhivs garamantas.lv sevī ītver ari lelu audio i video īrokstu kolekceju. Lītuotuojs arhivā var struoduot vairuokuos volūduos, tymā storpā ari latgaliski.

Foto nu LFK arhiva: Radopolis cīma etnografiskais ansamblis 1955. godā,  LPSR ZA EFI IX. zynuotniskuo ekspediceja Viļānu rajonā.

Digitalajā arhivā interesentim jau daīmamys vairuokys Latgolys pusis kolekcejis – folklorys vuokumi nu Kruoslovys, Bolvu, Viļakys, Baļtinovys, Ruguoju, Aglyunys nūvodim, kai ari materiali nu Abrenis apriņķa.

Latgolā savuoktuos dzīsmis i tūs meļdeni atrūnami Emiļa Malngaiļa tautys muzykys materialūs. Arhivā atrūnami ari vierteigi materiali par mozuokumtauteibom Latgolā, kurim lela nūzeime Latgolys kulturviesturis kontekstā – Sergeja Saharova Latgolys boltkrīvu folklorys kolekceja, Giršys Etkina Latvejis ebreju folklorys kolekceja i Ivana Fridriha Latvejis krīvu folklorys materiali. Biļžu i iļustraceju sadaļā var apsaviert fotografejis, kas uzjimtys vairuokuos ekspedicejuos, suocūt jau nu 1955. goda, kod nūtyka pyrmuo ekspediceja iz Latgolu – bejušajā Viļānu rajonā.

Itymā šaļtī LFK Aigara Lelbuorža vadeibā suokuse Latvejis etnografiskūs ansambļu repertuaru īskaņuošonu. Majā jau ir īraksteiti diveji Latgolys pusis ansambli – Benislavys i Medņevys etnografiskī ansambli. Ari itī īroksti byus klausomi garamantas.lv digitalajā arhivā.

Latvīšu folklorys kruotive laipnai aicynoj sevkuru pīsadaleit digitaluo arhiva pylnveiduošonā!

Jaunumim var sekuot leidza:

Twitterī – @garamantas ci Facebook kontā.

Projekts teik eistynuots ar LR Izgleiteibys i zynuotnis  ministrejis budžeta apakšprogramys 05.04.00 „Krišjāņa Barona Dainu skapis” i Vaļsts kulturkapitala fonda atbolstu.

Rokstu sagataveja: Kristīne Pokratniece