Da 1. augusta Daugovpiļs Marka Rotko muokslys centrā apsaverama Māra Grunska izstuode “Rēgi”.

Fotografeju serejā autors atveidoj pamastus kuormus, tymā skaitā bumbu patvertnis, sakaru bunkurus, kūdūlrakešu bāzis i ryupneicys Latvejā, rūsynojūt na viņ dūmuot par apsaimnīkuošonys problemom, nu ari ļaunūt saskateit tū naparostū skaistumu. Māris Grunskis stuosta: “Izstuodē “Rēgi” grybu paruodeit pamesteibys sovdabeigū auru i pīviļceibu. Vītys, kas nazkod bejušys slapanys i svareigys, vītys, kas spieja iznycynuot vasalys piļsātys tyukstūšom kilometru attuolumā, voi taišni pretieji – vītys, kurys beja paradzātys, kab pabaruotu voi pagluobtu symtim voi pat tyukstūšom cylvāku dzeiveibu. Myusu dīnuos gondreiž vysys tuos ir paguojušūs politiskūs īkuortu i storptautisku konfliktu rāgi. Kuormi ir pusnūjaukti, metala zagļu izlaupeiti, tok uzroksti iz sīnu, nūruodejumi apkolpojūšajam personalam i reizem pat dokumentacejis palīki vys vēļ nas nazkodejuo nūzeimeiguma atmosferu. Tī ir rāgi, kas reizem bīdynoj, cytreiz izaver amizanti, nu bīži mes tūs napamonom i vīnkuoršai paeeimom garum pa ceļam iz dorbu.” Autors nūruoda, ka, regulari nūsadorbojūt ar piļsātpietnīceibu, jis ir secynuojs, ka ituos vītys izamaina cīši strauji, dažys nu fotografejuos radzamajom vītom, par pīmāru, Mysys ballistiskūs kūdūlrakešu pazemis bāze, vairs naeksistej. “Ituos vītys apmeklejūt voi vysmoz radzūt fotografejuos, var rastīs piļneiguoks prīškstots par nasenejū paguotni, kas ar laiku dabuos leluoku viesturiskū vierteubu,” M. Grunskis komentej. Fotografeju sereja suoce veiduotīs 2009. godā. Pyrmū reizi tei tyka demonstrāta Latvejis fotografejis muzejā Reigā 2014./2015. goda mejā, radeita ar Vaļsts Kulturkapitala fonda atbolstu.

Māris Grunskis (1985) ar fotografeju suocs nūsadorbuot četrpadsmit godu vacumā. Itūšaļt pīsavierss piļsātvidis skotu, pamastu vītu i dobys skotu fotografiešonai. Struoduojs par uorštata fotografu “Neatkarīgajā Rīta Avīzē”. Nu 2008. da 2012. goda veiksmeigi pīsadalejs Latvejis Universitatis Biologejis fakultatis kasgadiejūs fotokonkursūs “Mana šī gada labākā dabas bilde”. Pyrmuo personalizstuode “232 km” tyka atkluota 2009. godā Daugovpiļs dūmis administracejis Reigys birojā, itymā pošā godā Māris pīsadaleja jaunūs fotografu dorbu izstuodē “Rosols” Daugovpilī. Māris Grunskis ir bejs Ūgris fotokluba bīdrs nu 2010. da 2013. goda. 2012. godā sajēme 2. vītu fotokonkursa “Latvijas fotogrāfi atklāj Latgali” nominacejā “Daba”. Pīsadalejs rodūšajā nūmetnē “Karosta – fotoosta” 2012. i 2013. godā. 2014. godā pabeidzs fotokursus Tehniskuos jaunradis nomā “2Annas” Andryva Granta fotostudejā.