Nu 15. da 19. juļa vysaiduos Latvejis vītuos nūtiks Storptautiskais folklorys festivals “Baltica 2015”, nu festivala nūslāgums itūgod nūtiks Rēzeknē. Latgolys sirdī puļcēsīs ap 3000 festivala dalinīku, aicynojūt vērtīs, klauseitīs, sadzīduot i sadoncuot. 

Festivala “Baltica 2015” dalinīki Rēzeknē īsarass pīktdīnis – 17. juļa vokorā i iz reizis grīzs jautrus daņčus Festivala parkā, nu nuokamajā vokorā sadoncuot varēs ari pi piļskolna.

Sastdīnis, 18. juļa reitu īskandēs ar jaunuokūs skonu īrokstu prezentaceju Rēzeknis kulturys nomā, tī kapela “Maskačkas spēlmaņi” īpazeistynuos ar sovu jaunuokū albumu “Apleik kolnu”, folklorys draugu kūpa “Savieši” ar  albumu “Zirga pase”, i nūtiks ari naseņ izdūtuo latvīšu volūdys izlūkšņu audio paraugu izdavuma “Viena zeme, vieni ļaudis, nav vienāda valodiņa” prezentiešona.

Nadaudz vāluok – 11.00 Latgolys Kulturviesturis muzejā nūtiks latvīšu tautys tārpu izstuodis “Mūsu mantojums” atkluošona, ekspozicejā byus apsaverami vysu Latvejis kulturviesturiskūs nūvodu etnografiskī i arheologiskī tautys tārpi i rūtys, kurus darynuojuši TLMS dalinīki, omotnīki i rūkdorbnīki nu vysys Latvejis. Izstuodis atkluošonys šaļti svineigu i eipašu padareis suitu jaunivis apviļkšona, kū demonstrēs etnografiskuo ansambļa “Gudenieku suiti” vadeituoja Lideja Jansone.

Sovukuort Rēzeknis Centralajā bibliotekā 12.00 sasatiks 7 stuostnīki nu Skotejis i 3 Latgolys stuostnīki – Andris Čakāns nu Ruguoju nūvoda Lozdukolna, Anita Rutule nu Rēzeknis nūvoda Nagļu i Trifina Ovčiņnikova nu Rēzeknis nūvoda Audriņu, kuri ar interesantim stuostim īinteresēs vysu paaudžu klauseituojus.

Sastdīnis pušdīņlaikā Rēzeknis Festivalu parku pīskandynuos dažaidi mozuokumtauteibu kolektivi, nu Latgolys viestnīceibā GORS koncertā “Četri vārdi” uzastuos i četrys dobys stihejis –  zemis, iudiņa, guņs i gaisa – izdzīduos i izdoncuos Latvejis spieceiguokī i skaneiguokī folklorys kolektivi.

Svātku ītvorūs pi Rēzeknis piļskolna vysu sastdīni apleicīnis pūdnīki kurynuos malnuos keramikys cepli, vokorā demonstrēs guņs sluopiešonu i cepļa aiztaiseišonu. Podnīka cepli kurynoj apmāram 12 stuņdis, nu tei ir cylvāka i guņs kūpsadarbeiba, partū precizu laiku, kod ceplis byus izakuriejs paredzēt nav īspiejams i vakariešona ar pūdnīkim var īilgt da vālys nakts. Svātdīnis reitā cepli taiseis vaļā, tod varēs lyukuots, kaidi breinumaini muola dorbi byus izadavuši i sevkurs varēs ari nūpierkt syltus muola traukus taišni nu pūdnīku rūku.

Sastdiņ i svātdiņ Rēzeknis Festivala parkā vysi aicynuoti mīluotīs i īsapierkt Latgolys godatiergā, tymā pīsadaleis lels pulks omotnīku, vysaidu meistaru, ražuotuoju i zemnīku nu vysys Latvejis ar pošu taiseitu, audzeitu voi gataveitu produkceju.

18. julī 14.00 leli i mozi teik aicynuoti iz kūpeigu nūvodu sasadzīduošonu Rēzeknis Festivala parkā.

Festivala “Baltica 2015” dižkoncerts “Četru tāvu bagateiba” sastdīnis vokorā 17.30 skanēs Ančupānu īlejā i aicynuos apsazynuot myusu folklorys boguoteibys caur dobys i četru godalaiku ritu. Dižkoncertā uzastuos i Latvejis folklorys kūpys, i gosti nu Norvegejis, Pūlejis, Lītovys, Ukrainys, Krīvejis, Boltkrīvejis, Īrejis i cytom vaļstim.

Svātdiņ, 19. julī, festivala dalinīki puļcēsīs Rēzeknis piļskolnā i leluos saimis reitā svieteis kūpā byušonu, muzicēs, doncuos, sadzīduos i apdzīduos, stuosteis jūkus i cīnuos ar veseleigim lobumim, kab piec tam iz reizis dūtūs svātku guojīnī pa guojieju promenadi iz Festivala parku, kur 13.00 festivals “Baltica 2015” nūsaslēgs ar uorvaļstu grupu koncertu. Tymā uzastuos i myusu tyvuokī sābri nu Lītovys, Igaunejis, Boltkrīvejis, Krivejis, i myusu tautīši nu Sibira i Lelbritanejis, kai ari gosti nu Pūlejis, Ukrainys, Īrejis, Skotejis, Gruzejis i Portugalis.