Naujinē nūtiks Daugovpiļs nūvoda Gruomotu svātki
7. augustā Naujinis pogostā nūtiks Daugovpiļs nūvoda 14. Gruomotu svātki. Pasuokumā ar gruomotu goldu pīsadaleis ari Latgolys Studentu centrs.
Vysys dīnys garumā Gruomotu svātkūs nūtiks gruomotu komercizstuode, kurymā pīsadaleis na tikai Latgolys Studentu centrs, nu ari taidys izdevnīceibys kai “Zvaigzne ABC”, “Lauku Avīze”, “Jumava”, “Nordik”, “Avots” i cytys.
10.30 ar muzykalu sveicīni saguojušūs sveicynuos Naujinis kulturys centra folklorys kūpa “Rūžeņa”, nu 11.00 nūtiks Gruomotu svātku atkluošona “Kad ziedu dārzā saule rotājas…”. Tam sekuos publiskuo diskuseja par izgleiteibu, kurymā aicynuota pīsadaleit ari izgleiteibys i zynuotnis ministre Māreite Seile. Pīaugušī ari aicynuoti iz sasatikšonu ar rakstneicu Moniku Zeili, rakstnīku i nūvodpietnīku Stanislavu Ružānu, kai ari eksprezidentu Valdi Zatleru.
Vysaidys aktivitatis paradzātys ari bārnim: pyrmsškolys vacuma bārnim byus vareiba pīsadaleit rodūšā nūdarbeibā ar muokslineicu Melāneju Vylku, suokumškolys vacuma bārni varēs pīsadaleit dzejis stuņdī ar Uldi Ausekli, kai ari rodūšajā darbneicā “Izkrāso Naujeni!”, nu pamatškolānim paradzāta sasatikšona ar rakstneicu Vitu Štelmaheri. Vysus bārnus prīcynuos ari pīpyušamuos atrakcejis, body art, kai ari vysaidys sportiskuos aktivitatis.
Paraleli jau pīmynātajom nūtikšonom byus apsaverama ari muokslineicys Anitys Karpenko gleznu izstuode, kai ari Omotnīku sadarbeibys bīdreibys izstuode. Taipat nūtiks ari vairuokys rodūšuos darbneicys: “Zum, zum, bites zum…” Valda Grebeža vadeibā, Leluo musturdeča veiduošona, “Tautas atmiņu lāde”, kai ari dekorativūs karūdzeņu fabrika ar sīvīšu klubu “Šarms”.
