“Kapļi” izdūd debeja albumu “Ašņa Dasys”
Poetiskuo roka apvīneiba “Kapļi” izdavuse debeja albumu “Ašņa Dasys”. Nu 9. augusta albums elektroniski pīejams muzykys straumiešonys vītnēs (Spotify, Deezer, iTunes u.c.), kai ari soundcloud.com. Tyvuokūs nedeļu laikā albumu ar eipaši veiduotu dizainu byus vareiba īsaguoduot ari CD formatā.
Jaunajā albumā “Ašņa Dasys” īkļautys 10 dzīsmis. Kai soka poši apvīneibys dalinīki – vysys dzīsmis byus par mīlesteibu, koč i lirikā pasaruoda taidys temys kai religeja, regionaluo ekonomika, emigraceja, nacionalais romantisms i cytys. “Kapļi” par sevi soka, ka jī ir poetiskuo roka apvīneiba, kura nasabeist lītys saukt eistajā vuordā. Taišni saukt, na dzīduot, partū ka solists prīšknasumūs tai ari vaira runoj, na dzīd.
Albuma nūsaukumu “Ašņa Dasys” apvīneiba skaidroj leidzeibuos – ašņa dasa ir taids iedīņs, kuru kotru dīnu naād, nu pasnādz viņ svātku reizēs. Taipat klauseituoji teik breidynuoti, ka dasuos var gadeitīs ari pa kaidam žyrnuokam ašņa gabaleņam. Eipašū iedīni – ašņa dasu – byus vareiba paraudzeit ari albuma prezentacejis koncertā 21. augustā 21.00 Latgolys viestnīceibys GORS jumta terasē. Koncerta gosti byus legendarī Latvejis pankroka veterani, grupa “Inokentijs Mārpls”. Prezentacejis laikā byus vareiba par eipašu cenu īsaguoduot “Kapļu” albumu CD formatā.
“Kapļi” ir lepni, ka var pīruodeit – pat taidā Dīva aizmierstā Latgolys styurī kai Buozovā var tapt kvalitativa muzyka i īroksti.
Poetiskuo roka apvīneibys “Kapļi” sastuovs: Oskars Orlovs (Kapļu Kaplis), Arņs Slobožanins (Kaplis–divrūcs), Rasma Kulamova (klavīris), Andris Jurjāns (Jurjāns Bum-Bum), Jurs Linužs (zamuos frekvencis), Aija Čoiča i Juoņs Noviks (pīpyušamī instrumenti), Elgars Ludbuoržs (steigu instrumenti).
Īrokstūs kai gosti pīsadalejuši: Julien Dicharry (gitara, bolss), Eriks Zeps (akordeons), Madara Broliša (vejūle), David Whitlock (gitara).
Albums īraksteits skaņu īrokstu studejā “Buozova”. Īrokstu producents Arņs Slobožanins, miksēja Armands Treilihs, māsteringu veice Nicolas Daves (Franceja). Albuma dizainu veiduoja Aivars Bulis. Zeimiejumi – Oskars Orlovs, Aurēlija Rancāne.
