Dīnvydlatgolys NVO atbolsta centrs izsludynuojs Latgolys NVO projektu programu 2015, kurys mierkis ir Latgolys planavuošonys regionā veicynuot pylsūniskuos sabīdreibys iniciativys, dzeivuotuoju leidzdaleibu i storpkulturu dialogu, tymā skaitā mozuokumtauteibu dorbu, informej Oskars Zugickis.

Kūpā konkursam pīejami 24 000 EUR, kas sadaleiti trejuos atbolsta jūmuos:
1. pylsūniskuos sabīdreibys iniciativu atbolsta projektim (8 000 EUR) (informativi i izgleitojūši pasuokumi par interešu aizstuoveibu i leidzdaleibu lāmumu pījimšonā, īsaistūt sadarbeibys partnerus nu NVO, pošvaļdeibu, izgleiteibys īstuožu i t.t.; pasuokumi, kas dūd zynuošonys i atteista pylsūniskuos prasmis i vareibys; pasuokumi, kas veicynoj sabīdreibys iniciativu i īsasaisteišonu vītiejuos kūpīnys dzeivis uzlobuošonā)

2. storpkulturu dialoga atbolsta projektim (8 000 EUR)(sovstorpiejuos izpratnis veiduošona, stereotipu mozynuošona, vysaidu tauteibu puorstuovu īsaiste aktivitatēs, kas vārstys iz salīdieteibu i īkļaujūšu pylsūniskū leidzdaleibu.)

3. mozuokumtauteibu NVO atbolsta projektim (8000 EUR)(mozuokumtauteibu identitatis i kulturys montuojuma saglobuošona i atteisteiba, mozuokumtauteibu rodūšūs kolektivu darbeibys atbolsts, mozuokumtauteibu tradiceju i folklorys atteisteiba, mozuokumtauteibu pylsūniskuos leidzdaleibys i sadarbeibys sekmiešona, Latvejis romu kūpīnys integracejis i leidzdaleibys sekmiešona, tymā skaitā sekmēt sadarbeibu storp romu kūpīnu i pošvaļdeibom i socialajim partnerim, jemūt vārā Latvejis romu integracejis politikys pasuokumu kūpumu, kai ari atbaļsteit romu kūpīnys kulturys identitatis saglobuošonu i storpkulturu dialogu.) 

Vīnam projektam maksimali pīejami 3000 EUR, termeņš projektu īsnīgšonai ir 2015. goda 3. septembris.