Muzykaluo vosora Vyšku estradē beja boguota skaneigom muzykalom nūtikšonom. Kab izadoncuotu da reitausmys voi izbaudeitu skaneigys dzīsmis koncertūs, sevkurs varēja atrast sovai gaumei pīmāruotuokū muzykalū pavadejumu.

Jau ūtrū godu Vyšku estradē vysys vosorys garumā, kotra mieneša golā nūtyka koncerti ar Latgolā i Latvejā popularom grupom i izpiļdeituojim, kas deve vareibu izbaudeit kvalitativu muzyku i izaballēt da saulis lākta vīnā nu skaistuokūs Latvejis breivdobys skotuvu. Eipašu skaniejumu dūd estradis teritorejis reljefs, kas beja veiduots speciali koncertim i koru skatem. Skateituoji ir nūviertiejuši ari sakūptū vidi apleik i smiļšainū Luknys azara pludmali, kas atsarūn tik dažu sūļu attuolumā nu estradis. Itaidu salykumu var saleidzynuot vīneigi ar slavanū Dzintaru koncertzalu. Tradicionali vysi koncerti nūsaslādz ar zaļumbalu, kas nūtyka iz leluo deju plača, kas sovys izcyluos eipašeibys vysā piļneibā itūgod atkluoja Latgolys deju svātkūs, kod laukumā vīnlaiceigai doncuoja vairuoki symti dalinīku, nu kūpā izdoncuoja tyukstūšys.

29. majā muzykalū vosoru īgrīze jaunūs muziku festivals “Pagrabu dziesmas zem zvaigznēm”, kurā ar sovu snāgumu dalejuos taidys grupys kai jaunīšu grupa “Mažors”, “LS Process”, “Saintorment” ar solisti Agatu Jermaļonoku, “SOLITE”, “Padod Stīgu” i “Spacing”.  Jaunūs muziku festivals izacēle ar sovu augstū kvalitativū snāgumu.

23. junī tyka nūļusteits Leigū pasuokums “Trejdeviņas burvestības Līgo naktī” ar īmeiļuotim izpiļdeituojim “Stage On”, “Rožupes vīri”, “Dvinskas muzikanti”, Eriku Gruzneņu, duetu “Inga un Normunds”, Daini Skuteli, Puncuļu saimi i cytim interesantim prīšknasumim, puorsteigumim i burvesteibom. Leigū nakts svieteituoji tyka aicynuoti nūdegustēt Daugovpiļs nūvoda lobuokū sātā taiseitū olu i sīru. Nasaverūt iz leitainū laiku, Vyšku estrade puļcēja vaira kai tyukstūšu leiguotuoju nu tyvuoku i tuoluoku molu. Itūgod pyrma koncertprogramys Vyšku stadionā nūtyka storptautisks maratona pūsms 50 i 100 km distaņcēs, kas puļceja dalinīkus nu vairuoku pasauļa vaļstu.

31. julī sevkurs vosorys baudeituojs tyka aicynuots iz koncertu ar Eriku Gruzneņu i iz ļustiešanu ar DJ Normundu.

Muzykaluos vosorys izskaņā – 28. augustā – ostoņdasmytūs godu muzikys festivals “Saldie 80tie” ar Latvejā legendarū grupu “Menuets”, kurymā beja īspiejams dzierdēt vysim zynomys i īmeiļuotys 80. godu dzīsmis i tuo laika izpiļdeituoju kompozicejis dzeivajā skaniejumā. Tyka izdzīduotys popularuokuos dzīsmis nu grupys repertuara – “Dziesma, ar ko Tu sāksies”, “Viņi dejoja vienu vasaru”, “Alvas zaldātiņi” i cytys, kai ari dzīsmis nu kinu – “Ak Johans, Johans”, “Bimini”. Koncertu īsiļdeja grupa “Dvinskas muzikanti” ar sovom popularuokajom dzīsmem, tamā skaitā tom, kas itūšaļ pīsadola šlageraptaujā (“Dzymtuo puse”), i ari ar jau tautā īmeiļuotom dzīsmem (“Hei, bruoļ latgalīt”).

Piec koncerta zaļumbalu ar 80. godu hitim pīpiļdeja Latgolā zynomais DJ Normunds, kas puorejai Latvejis publikai vaira ir zynoms kai izpiļdeituojs nu dueta “Inga un Normunds”. Normunds ir tys dīdžejs, kas ir lics diskotekys tuolajūs astoņdasmytajūs i līk ari itūšaļt, partū ari labi izprūt publikys vēļmis.

Bez agenturys “TAKA” organizātūs pasuokumu Vyšku estradis i stadiona kompleksā nūtyka ari vairuoku lelu organizaceju sporta spēlis. Maja beiguos vairuoku dīnu garumā sporta spēlis organizēja Nacionalī bruņuotī spāki. Sporta spēlis suocēs ar nalelu paruodi i pyutieju orkestra defile šovu. Pasuokums nūsaslēdze ar dalinīku apbolvuošonu i balu. Piec lela puortraukuma stadionā tyka īdagta olimpiskuo lāpa, kas ar sovu guni prīcynuoja spēļu dalinīkus i gostus.

Vosorys mienešūs sporta spēlis sovim darbinīkim organizēja “Hansa-flex”, Latvejis miernīku bīdreiba i guņsdziesieji. Latvejis miernīku bīdreiba sovys sporta spēlis izavielieja organizēt kūpā ar pogosta svātkim, kas beja obpusieji izdeveigi i vareiba izveiduot svātkus kruošņuokus i satureiguokus.

Bez izklaidis pasuokumu, vysys sezonys garumā nūtyka i treneni, i vaļsts mārūga saceņseibys vīglatletikā, futbolā, basketbolā, strītbolā, pludmalis volejbolā. Sportisti, muzykanti, pasuokumu organizātuoji i atpyutnīki augstu nūviertēja lobū kompleksa kvalitati, tuo materiali tehniskū bazi i sadarbeibu ar darbinīkim.

Paļdis vysim, kas guoja iz muzykalajim i sporta pasuokumim i ar sovu leidzdaleibu prīcuojuos leidza. Tiksimēs muzykaluos vosorys pasuokumūs Vyšku pogosta estradē cytugod!

Informaceju sagataveja Daugovpiļs nūvoda pošvaļdeibys agentura “TAKA”