11. septembrī 13.00 Raiņa muzejā Juosmuiža (Preiļu nūvoda Aizkaļnē) tiks svieteita Raiņa 150. dzimšonys dīna ar jaunys izstuodis “Raiņa dzejas rotaļas” atkluošonu (Latgolys tradicionaluos kulturys i omotu sātā). Pasuokumā dzīsmis ar Raiņa, Aspazejis, cytu dzejnīku vuordim, tautysdzīsmis dzīduos Preiļu nūvoda BJC vokaluo studeja “Mazās lāsītes”. Eipaši gaideiti pyrmsškolys i suokumškolys bārni.

Rainis sarakstejs daudzus bārnu dzejūļu kruojumus: “Zelta sietiņš”, “Puķu lodziņš”, “Vasaras princīši un princītes”, “Lellīte Lolīte”, “Putniņš uz zara”, “Saulīte slimnīcā”, “Saules gadi”.

Kai viestej Raiņa i Aspazejis muzeja vītneica Solvita Bryuvere, izstuodē byus apsaveramys Raiņa dzejūļu ilustracejis nu Rakstnīceibys i muzykys muzeja kruojuma. Tūs autori ir muokslinīki Juoņs Kīns, Kārlis Sūniņš, Jezups Pīgoznis, Margarita Stāraste i Felicita Pauļuka.

Itamā izstuodē sevkurs apmaklātuojs varēs spielētīs ar Raiņa dzejūlim: savīnojūt pareizūs puorus, skaitūt da desmit, sameklejūt i īvītojūt dzejolī eistūs vuordus, verūtīs animacejis kinu “Zelta sietiņš”, klausūtīs i dzīžūt leidza dzīsmis, eimūt rūtaļuos, pyušūt zīpu burbuļus, īsajiutūt Raiņa dzejis tālūs voi izzeimejūt dzejūli.

Izstuode “Raiņa dzejas rotaļas” Juosmuižā byus apsaverama da 31. oktobra.

Izstuodi atbolsta VKKF.