20. septembrī Aglyunys bazilikys sakralajā laukumā atkluoje karaļa Mindauga i karalīnis Martys pīminekli. Atkluošonys pasuokumā pīsadaleja gon goreidznīki, gon Latvejis i Leitovys vaļdeibu puorstuovji.

Treisfiguru kompozicejā Karaļa i Karalīnis tāli simbolizej lītuvju i latvju tautu radnīceibu i vīneibu, mozais puisāns – Priņcs ir kai cereibys zeime myusu zemju i tautu nuokūtnei, skaidroj idejis autori.

Pīminekļa autors ir lītuvīšu skulptors Vidmants Giliki, pīmineklis bronzā atlīts Viļņā.
Pīminekļa izgatavuošonys izmoksys ir ap 54 000 eiro, leidzekļus zīduoje gon Latvejis, gon Leitovys ļauds.

Pietnīku reiceibā asūšuo informaceja līcynoj, ka 1253. godā ar Rūmys pāvesta Innocenta IV svieteibu Mindaugs tyka krūnāts par Lītovys karali. Reizē ar jū tyka krūnāta ari karalīne Marta, kura beja cālusēs nu latgaļu virsaišu dzymtys i beja Madalānu piļskunga meita. Marta tyka krūnāta par Lītovys karalīni atbylstūši sova laika tradicejom – ar pāvesta svieteibu.

Kai viestej legenda, 1263. godā ceļā iz Aglyunu pi sīvys rodim Mindaugu i divejus juo mozgadeigūs dālus nūgalynuoja Lītovys augstmaņi. Karaļs tics paglobuots tīpat Aglyunā.

Itai versejai par lobu līcynoj 17. godu symta luteraņu muoceituoja Rīvija hronikā mynātais fakts, ka 1618. godā Aglyunā, nūvuocūt kaida trūņa drupys, ir atrosta marmora plāksne. Leidz myusu dīnu tei gon nav sasaglobuojuse, bet ir sasaglobuojs latiņu teksta nūroksts, kurā saceits:„Itamā zemē atsadus Mindaugs, kunigaits, lītuvīts, kuram dzeivuot i miert beja gūda līta…” Piec vīnys nu versejom, trūņa drupys atsarodušs pi tagadejim kopim, taipat ari pastuov uzskots, ka Mindaugs tics puorapglobuots bazneicā zam oltora.

Karteņa: facebook.com