2. oktobrī Daugovpiļs teatrī gaidoma pyrmizruode Krīvejis dramaturga V. Sigareva lugys “Krievu loto” jaunīstudiejumam “Latgaliešu rulete” Olega Šapošnikova režejā. Tei byus šokejūša komedeja latgaliski, kurymā ospruoteigā veidā tiks atkluota cylvāka dobys naparadzameiba.

Daugovpiļs teatra skateituoji jau zyna dramaturga Vasileja Sigareva dorbu “Ekstrasensa cīņa” (rež. I. Lūsis). Sovūs dorbūs V. Sigarevs dasagiun parostu cylvāku dzeivei, kas ir vīns nu īmaslu, parkū juo dorbi spiej uzrunuot tik lelu auditoreju. Koč i jaunīstudiejums “Latgaliešu rulete” nav vīns nu rakstureiguokūs dramaturga dorbu, tymā var atrast Sigareva lugu byutiskuokū elementu – aiz satirys i komiskuo pleivura nūglobuotū dzeivis patīseibu.

“Latgaliešu rulete” ir stuosts par Līpeņu saimis azartiskū pīdzeivuojumu. Liktiņs jim pieški pīspieliejs lelū laimastu, nu tikpat nagaideitai tū ari nūglobuojs. Golvonī varūni navar rast sev vītu, raugūt saprast, kur pagaiss jūs laimeigais belets. Patīseibys vaicuojumūs Līpeni ir gotovi likt lītā vysus īspiejamūs īrūčus, kas vaiņugojās ar puorprotumim boguotu nūtikšonu vērtini, kurymā natryukst ni jautreibys, ni ospruoteibys, ni krītnys devys latgalīšu humora.

Lūmuos: K. Veinšteina, E. Viļums, M. Kuorkliša, R. Gailums, L. Ivanova, M. Korsiets, M. Abramovs.

Pyrmizruode – 2. oktobrī 18.30.

Tyuvuokuos izruodis  –30. oktobrī 18.30 i 27. novembrī 18.30.

Beleti – Daugovpiļs teatra kasē (65426520) i škārsteiklā.

Foto: Džeina Saulīte